Mizoramin all India service cadre hran a neih theih nan cabinet-ah ngaihtuah dawn

Chief minister Lalduhoma chuan nimin khan a pisaah Mizoram IAS Association hruaitu te, All India Services (AIS) member dangte leh Zoram Research Foundation hotute a kâwm a, Mizoramin all India service cadre hran a neih ve theih dan tur chungchang a sawipui. CM chuan, cadre hran neih chungchang hi cabinet meeting-ah telh a nih tur thu a sawi.

CM Lalduhoma chuan, Mizoramin all India service cadre hran a neih ve chu a kaihhruai sorkar pawhin a duh leh a rualawhna a nih thu leh, nasa lehzuala bawhzui a duh thu a sawi a; cabinet meeting-ah sawiho tura chhawp chhuah a tum thu pawl hruaitute chu a hrilh a ni.

Inkawmhonnah hian Mizoramin all India service cadre hran a neih theihna tura hmalakna awm tawhte sawi lan niin, cadre hran neih ṭhatna leh lukhâwng a neihte sawi a ni. Sorkar tharah beiseina sang tak nen tha thara hmalakna awmze nei lehzual kalpui an duh thu pawl hruaitute chuan an sawi.

Inkawmhonaah hian Mizoram IAS Association aiawhin Vanhela Pachuau, C Ropianga, Lungmuana leh Lalzirmawia Chhangte an tel a; Indian Police Service (IPS) aṭangin mi panga - Lalrokhuma Pachuau, C Dothanga, PC Lallawmsanga, Zoram­mawia leh C Laldina te an tel. Zoram Research Foundation aiawh Prof. Thangchungnunga leh Rochamliana te an tel bawk.