Hotel, hostel, thingpui dawrte AMC-in an enfiah ṭhin dawn

Aizawl Municipal Board of Councillor meeting-in a din Committee on Regulations of Restaurant, Hotel & Hostel-te chuan Aizawl khawpui chhunga hostel, hotel leh thingpui dawrte an endik ṭhin dawn.

AMC Committee on Regulations of Restaurant, Hotel & Hostel hotute chuan nimin khan Aizawl Press Club-ah thuthar thehdarhtute an kâwm a; Aizawl khawpuia restaurant, hotel leh hostel-te an endik ṭhin dawn thu sawiin, "November chawlhkar hnihna aṭangin hrilh lâwk loin endik ṭhin a ni dawn," an ti.

Committee on Regulations of Restaurant, Hotel & Hostel hotute sawi danin, restaurant, hotel leh hostel-te chu November 2024 chhung hun pek an ni dawn a, chumi hnu lama dan zâwm lote chungah chuan dan anga hmalak tum a ni.

Tun dinhmunah AMC hnuaiah hotel 148, hostel 148 leh thingpui dawr 819 an inziak lut a; chu'ngte chu thil chi hrang hrangah endik a ni dawn. Endikna tur zingah chuan, hostel-ah ei leh in an pek ṭhat leh ṭhat loh te, mutbu dinhmun te, tui thianghlim an pek dante a tel.

ENDIKNA TUR ṬHENKHAT

* AMC hnuaiah registration an ti em?

* Registration a nung (valid) em?

* License number dawr neituin langsar takin signboard-ah a târ leh tar loh.

* Ei tur siamtute leh hotel/hostel siam­tute'n faina leh thianglimna chung-changah, dan angin hma an la em?

* Bawlhlawh thliar (waste segregation) an ti em?

* Regulation-te an zawm ṭhat leh ṭhat loh.