Assam Rifles sawn chhuah hi kan dinna nghet a ni - Tawnluia

MNF party chuan nimin khan an pisaah chhung inkhawm an hmang a; thusawitu MNF NCC member Tawnluia chuan, Aizawl khawpui laili aṭanga Assam Rifles sawn chhuah chu an dinna nghet a nih thu sawiin, "An kalsan tur ram hi vantlang tan ruahman a ni," a ti.

Tawnluia chuan, AR sawn chhuah chu Laldenga (L) sûlhnu pakhat zinga pawimawh tak a nih thu sawiin, "Kum 1986-a remna thuthlung ziah a nih khan Pu Denga ngaih pawimawh hmasak ber zinga mi chu AR sawn chhuah a ni. Zokhawsanga AR ram tura kan pek pawh Pu Denga CM lai, Revenue minister ka nih lai a ni," a ti a; a tirah 'Kan leng lo e' an tih avangin survey neih nawn leh a ni a, mimal ram lakna atan zangnadawmna cheng vbc. 92 sèn a nih thu a sawi.

AR biak-in hmun chungchangah Tawnluia chuan, "Tuna Chief Minister-in MoU draft lo awm tawhah AR neih hlen tur anga a sawi kha thu dik lo hulhual a ni. AR lamin draft rawn siam mah se, kan pawmpui lo. Kan sorkarah khan Quarter Guard leh Loch House-te pawh hi Mizoram sorkarah an hlan ngei tur a ni tih kha kan thu hnuhnung a ni. Biak-in hi Zokhawsanga an insawn hunah a compound nen Mizoram Synod hnenah hlan a ni ang, tih a nih angin kum 1987-ah kan pe," a ti.

Tawnluia chuan, AR sawn chhuah chu hnam issue a nih avangin chhuak ngei se an duh tih sawiin, "Tuna kan sorkar nena agreement an siam erawh hnam tana him lo tam tak awm thei niin a lang. Hnam himna tura puih an ngaihnaah puih kan inhuam reng," a ti a; a hmun erawh joint verification an neih hma chuan khawih chêt ni lo sela a ṭhaa a hriat thu a sawi bawk.

Dy. CM hlui chuan kum khat pawh tlin hmaa nawrh khum ngai sorkar a la hre ngai lo tih sawiin, "Wheelbarrow sorkar an sawi ang maiin an sulhnu a ṭawp a, chhiah an tipung a, thil man an tisang a, thil man lo sang chuan sumdawngten an hlawkna an chàn phah. Mahni inhaivur nana mipui min hrek hi inenlet a, mipui tana thawk zawk turin ka chah duh a ni," a ti.