Kawlphetha harsat chhan sawifiah; "Intodelh turin hma kan la" - Minister

Power & Electricity minister F Roding­liana chuan, kawlphethaa harsatna awm chhan nimina ZPM pisaa chhung inkhawmah a sawifiah a, "Kawlphethaa intodelh turin nasa takin hma kan la," a ti.

F Rodingliana chuan, tunlaia kawlphetha awm ṭhat tâwk loh chhan bulpui ber chu kawlphetha mamawh a san thut vang a nih thu sawiin, "Kan hman nasat lai bera kan mamawh zat chu kum 2017-18 ah megawatt 103.05 a nih laiin, kum 2023-24 ah chuan MW 160.10 a ni tawh," a ti a; kawlphetha mamawh punna a san avangin hmanruate'n a zawh tawh loh thu a sawi.

Power Minister chuan, Mizoramah power consumer 2,95,270 an awm tawh thu sawiin, "April 2024 thleng khan transformer (DT) 2,376 a awm. Transformer-te hian load an la hnem em em em a, tunah hian a bikin Aizawl leh khawpui lian ṭhenkhata transformer-te overload, eng emaw thulha puak mai thei 325 kan nei. He harsatna sukiang tur hian transformer a tam thei ang ber thlak tum a ni," a ti.

Sum indaih loh avangin ṭum khatah mamawh zawng zawng phuhrûk vek theih a ni lo tih sawiin Minister chuan, "Mamawhna zualpui phuhru turin tun sorkar kum chhung hian transformer 40 vel lei tura ruahman mek a ni," a ti a, eng emaw zat chu Aizawlah phurh thlen a nih tawh thu a sawi.

F Rodingliana chuan, Aizawl khawpui châwmtu zingah 6.3 kVA Tlangnuam, Maumual, Chawnpuite chu overload zual an nih thu a sawi a, "132kV Melriat sub-station-ah tuna 12.5 mVA awm mek hi a overload ṭan tawh avangin a phurh luh theih 8.33 mVA hi dah belh a ngai. Transformer 6.3 mVA hi tun sorkar kumah pathum tal kan lei loh chuan chhiatrup theihna a thleng thei tih kan hriat a, kan hlauthawng hle," a ti.

Power Minister sawi danin, transformer chu order a nih aṭangin rem khawm (assemble) nan thla 3 vel hun a duh a, chhiatna thleng palh thei laka inven theih nan sum lam pawh an ngaihtuah mek a ni.

Sorkar laipui scheme RDSS aṭangin Aizawl chhung bikah ABC cable (hrui) km. 575-a sei thlak tur hna thawh mek a ni a, km. 205.778-a thui thlak tawh niin, hmabak km. 369.22 a la awm. Hrui thlak avangin load shedding tih zeuh zeuh a la ngai dawn a, mipui hriatthiamna an ngen.

Smart City Project hnuaiah multiple utility pole (electric ban) 1,007 thlak mek a ni a, zawh a ni ṭêp tawh. Aizawla hrui inzam tam tak chu ban phun tharah felfai taka zam tur a ni a, km. 8 vel thlak a ni tawh a, a bak km. 2 la awm chu zawh thuai tura chak taka hmalak a ni.

F Rodingliana chuan, kawlphethaa intodelh turin nasa takin hma an la tih sawiin, "Department lama kan thawhpuite pawhin ngaihtuahna an sêng nasa a, rim taka kan policy tihlawhtling tura ṭan an lakna ah lawmthu ka sawi. Tuirini Project bikah, sorkar hmasate'n he project an lo hnâwl tawh chu a DPR-te kan keu thar leh a, central lama kan tlân thlakpui hnuin project hlamchhiah mai tur pawh tihnunin a lo awm leh ta," a ti.

Tuichang lui, Vankal bul Pi Luiah pump storage siam tura hmalak a nih thu sawiin Rodingliana chuan, "Survey & investigation tih mek a ni a, hemi tihfel chuan DPR siam mai tur a ni," a ti a; tuna a lan danah chuan kawlphetha MW 52 siam chhuah theih a nih tur thu a sawi.