NLUP changtlung leh belh tlak zawk kan siam dawn - MPCC Sr. VP

Congress party chuan SInlung Hills Council inthlanpui neih turah November 2, Inrinni khan campaign khârna hun an hmang a; MPCC senior vice president Lalnunmawia Chuaungo chuan, SHC chu Congress party sorkarin a din a nih avangin a hringtu ngeiin a enkawl a ṭul thu leh, Congress party chuan NLUP an siam leh dawn thu a sawi.

Lalnunmawia Chuaungo chuan Inrinni khan Khawlian, Phuaibuang, Suangpuilawn leh Vanbawng biala khuaahte thu sawiin, "SHC hi Congress party-in a huam chhung mipui dinhmun atana pawimawh nia a hriat avanga a siam a ni a, a hringtu ngeiin a enkawl a ṭul, a hringtu enkawl tluka ṭha leh hmangaihna dawng an awm ngai lo," a ti.

Thil fel lo leh dik lo an siamṭha dawn nia sawiin Lalnunmawia chuan, "Sorkar hnathawk awm lohna chhungkua tan NLUP changtlung leh belh tlak zawk kan siam dawn a, Mizoram mipuiin a zar an zo leh dawn a, hlim takin an nun an hmang leh thuai ang. Ruahmanna ṭha zawk duang turin ngaihtuahna kan seng mek a ni," a ti a; NLUP chu hrang hranga mipuiin an nghakhlel niin a sawi.

MPCC Senior Vice President chuan, sum leh paiin hlimna tak tak a thlen lo tih sawiin, "Council enkawl turin mi ṭha, bial aiawha ding ngam mi huaisen, bial mipui sum enkawl tura mi rinawm thlan chhuah a ngai," a ti a; SHC bial tinah Congress party-in beiseina sang tak an neih thu a sawi.

Lalnunmawia Chuaungo chuan, Congress party politics chu ram leh hnam hmasawnna a nia sawiin, "Mahni inphatin kan che chhuak a ni. Hruaitu nawr kal chawp ngai an nei ve lo hi mipui tan a ṭha hle a ni," a ti.