SHC-ah kan chak chuan hmar tlangdungah hmasawnna káwl a êng tawh ang - ZPM President

ZPM leh HPC party-te chuan November 2, Inrinni khan Sinlung Hills Council inthlanpui atana campaign khârna inkhawm bial tin (bial 12)-ah an hmang. ZPM president Lalliansawta chuan, SHC-ah an chak chuan hmar tlangdungah hmasawnna káwl a ên tawh tur thu a sawi.

Lalliansawta hian Saipum biala campaign kharna inkhawmah thu sawiin, SHC inthlan chu an ngaih thutak thu a sawi a, "SHC General Election-ah mipuite'n hnehna min pe a nih chuan 'hmar thimpui' tia sawi ṭhin tlangdungah hian hmasawnna kâwl a êng ve tawh dawn a ni," a ti.

ZPM President chuan, "Hmar tlangdunga sorkar hmalakna tluang taka a kal theihna tur leh tlangdung mipui tan ZPM sorkar hi malsawmna thlentu kan nih beiseiin theihtawp chhuahin hma kan la a ni," a ti a; SHC inthlana thawk dun tura HPC nen inremna an ziah hnuah campaign an ṭan nghal tih a sawi.

Mizoram state a nih aṭanga tun thlengin sorkar hmasate'n hmar tlangdung an ngaihsak tâwk loa a lan thu sawiin Lalliansawta chuan, "Hmasawnna a kalmuang hle niin ka hria. Chuvang chuan, hmar tlangdung mipui pawhin tun ṭum inthlanah hi chuan rilru fîm tak leh hma lam hun thlir chunga hruaitu ṭha tak, sorkar lai nen lungrual taka thawk dun thei tur in thlan chhuah ngei ka beisei," a ti.

ZPM vice president C Lalnunnema chuan Zohmun khuaah campaign khârna hun a hmanpui a, "Mizoramin sorkar hmel thar duhawm tak kan hmuh hnu lawkah SHC inthlan a awm hi SHC bial ṭhenkhat opposition MLA biala awm mekte tan hun rangkachak a ni," a ti a; tlangdung hmasawn nan ruling biala awm ngei turin mipui a sáwm.

ZPM treasurer Lalchhuanthanga pawhin thu sawiin, ZPM chu party dangte'n an bei reng tih sawiin, "Dâwt thu leh thu belhchian dâwl lo hmangin nasa takin min bei mah se, Pathian chakna ringin huaisen takin hma lam kan pan zel dawn a, kan ram tana kan tih duhte kan ti zel dawn a ni," a ti.

SHC bial/khaw hrang hranga ZPM-in November 2, 2024-a campaign khârna an buatsaihah hian minister ṭhenkhat - C Lalsawivunga, PC Vanlalruata, Lalrinpuii, F Rodingliana, B Lalchhanzova leh Lalnghinglova Hmar te, Lok Sabha MP Richard Vanlalhmangaiha, MLA pathum - TBC Lalvenchhunga, Lalmuanpuia Punte leh Baryl Vanneihsangi te pawhin an hmanpui a ni.