Minister ṭhenkhatte campaign danin democracy mitnautê a khawih - Ruatkima

MNF party chuan November 2, Inrinni khan Sinlung Hills Council inthlanpui neih tura campaign khârna hun khaw hrang hrangah an hmang a; MNF treasurer Lalruatkima chuan, minister ṭhenkhat campaign danin democracy mitnautê a khawih niin a sawi.

Lalruatkima hian Inrinni khan Khawlian leh Phuaibuang khuaa campaign khârnaah thu sawiin, "SHC inthlanah party tin chuan campaign beihpui kan thlak a, theihtawp kan chhuah vek a ni. Minister ṭhenkhat campaign dan hian mipui rorelna democracy mitnautê a khawih," a ti.

Ruling party-a an hotu, minister leh MLA ṭhenkhat thusawi duh dan chu mipui vaunaa ngaih theih a nih thu sawiin Lalruatkima chuan, "Mipui vauna aw an chhuah ta hi hriatthiam a har a, a kaw tàwpah an ṭang ta mai em ni tih hi kan zawhna a ni. Inhrêkna lam hawi te, Aizawlah anmahni dawr tura lo kalte lo induhsan tur ang maia thusawi hriat tur awm," a ti a; chu'ngte chu Mizoram inthlana an la hriat ngai loh niin a sawi.

MNF Treasurer chuan, an lo tih dik loh tawhah ngaihdam dilin, "Kan tih dik loh leh tihsual palh tam tak a awm ang, in mi ngaihdamna kan dil a. Pathian leh kan ram tan theihtawpa ke pên chhunzawm turin tih tak zetin mipui ka sâwm che u a ni," a ti.

Lalruatkima chuan, khawtlang, bial leh ram hmasawnnate chu sorkar kal tawhte thlentir vek a nia sawiin, "Tuna mite hian eng nge an tih, eng hmasawnna hna mah an la thawk lo. Thla leh lawkah kum khat sorkar an ni tawh dawn a, eng nge kum khat chhungin an thawh, eng nge an tih? Sawi loh anga awm leh sawi anga awm lote hi kan hre fiah tawh," a ti a; SHC inthlanah MNF-in bial 12 zinga pakua an lak an inrin thu a sawi bawk.