DEO-in sorkar ṭawiawm turin a sáwm

Saitual district election officer Dr Lalngura Tlau, district bawrhsap chuan November 1, 2024 khan a pisaah November 5, 2024-a Sinlung Hills Council inthlanpui neih tura sorkar ruahmannate thuthar thehdarhtute a hrilh a; theihtawp chhuaha sorkar ṭawiawm turin thuthar thehdarhtute a sáwm.

Dr Lalngura Tlau chuan, inthlanna muanawm, felfai leh thianghlim neih a nih ngei theih nan inbuatsaihna a ṭha thei ang bera an kalpui thu a sawi a, "Inthlan buaipui tura ruatte training pek vek tawh an ni a, a huna che chhuak mai thei turin an inring tawh. Chanchinbumite'n MP leh MLA inthlanpuia kan thawhho tawh ang khan tun inthlanah pawh hian min thawhpui turin ka sawm che u a ni," a ti. Inthlan kaihhnawiha chanchin thar awmte bengvàr tur leh chanchin thar dik leh rintlak mipui hnenah pe chhuak turin chanchinbumite a beisei thu a sawi.

Saitual DEO sawi danin, inthlan buaipuitu (polling party)-te chuan vawiin hian zing dar 8-ah Saitual DC office aṭangin an duty-na tur hmun an pan dawn a, November 5, 2024 zing dar 7 aṭanga tlai dar 4 thleng vote thlak hun hawn a ni ang. Vote thlakna atan ballot paper hman a ni dawn.

SHC inthlan vawi hnihnaah hian bial 12 a awm a, chu'ng zinga bial pali - Khawlian, Phuaibuang, Suangpuilawn leh Vanbawng bialte chu Saitual district chhunga awm a ni a; bial paliah hian candidate 17 an awm dawn a ni.