EMRS, Tlangnuam sak mek endik

Mizoram State Project Monitoring Committee (MSPMC) chuan November 1, 2024 khan Tlangnuama Eklavya Model Residential School (EMRS) sak mek an endik. EMRS sak hna hi 97% zawh tawh a ni a, December 2024-ah zawh tum a ni.

MSPMC hi vice chairman RL Rinawma hoin an thawk chhuak a, secretary Lalthanzuala Ralte, task force member - Vanchhungi, Lalbiakmawia Khiangte, Vanlalneihna Ralte leh Lalremsangi Fanai leh, PWD executive engineer Laltlanthangi Ralte te an tel.

EMRS academic building leh office te, mipa leh hmeichhe hostel te, kitchen cum dinning hall, staff quarters block pathum leh non-teaching staff quarters-te an endik a ni. Heng bulding endikahte hian thawmṭhat ngai leh hna hmabak chhunzawm ngai engngemaw zat hmuh a nih thu sorkar thuchhuahin a tarlang.

EMRS sak mek hi zawh la ni lo mah se, sorkar laipuia EMRS Society thu angin kumin 2024-25 academic year-ah pawl 6-7 tan zirna ṭan a ni a, zirna ṭan tawh chungin sikul sak hna chhunzawm mek zel a ni. Sikul leh a ken telte sakna atan cheng vbc 23 ruahman a ni a, hna thawh tur aṭangin 97% vel zawh tawh niin, kumin December-ah zawh vek tum a ni.