KHAWTHLIR

Thisen pe

November 2, Inrinni khan KṬP, Dinthar Branch chuan ZMC tan thisen unit 50 an pe a, petute mipa 46 leh hmeichhia pali an ni; KṬP, Chawnpui Branch pawhin Synod Hospital tan unit 23 an pe a, petute mipa 14 leh hmeichhia pakua an ni. Inrinni vek khan ṬKP, Rahsi Veng Unit chuan Lunglei Civil Hospital tan thisen unit 33 an pe a, petute mipa 27 leh hmeichhia paruk an ni.

Ram vahnaah inkaphlum palh

November 1, 2024 tlaiah khan Chhuarlung, Siaha district ramah, ram vak an inkap palh a, L Beirochono (32), College Veng, Siaha a thi.
Siaha Police aṭanga thudawn danin, L Beirochono hi ram vak turin Chhuarlung ramah hian a kal a, Chhuarlung khaw mi ram vak ve tho chuan sa emaw tiin a kap a ni. L Beirochono hi a hliam tuar loin kah a nihna hmunah hian a thi. Siaha Police-te chuan mi kaphlumtu hi manin, thubuai an siam sak a, Siaha District Jail-ah dah luh a ni.

EFCI Hmeichhe Pawl inkhawmpui

Evangelical Free Church of India (EFCI), Mizoram region huam chhunga presbytery pangate chuan November 1-3, 2024 chhung khan presbytery inkhawmpui an hmang. Inkhawmpui hi Aizawl Presbytery-in Zokhawthar-ah, Lunglei Presbytery-in Hmunnuamah, Kolasib Presbytery-in Vairengteah, Khawlian Presbytery-in North Khawlêkah leh Sakawrdai Presbytery-in Ṭinghmunah an hmang a ni.

Ramri khâr rih

November 5, naktuka Sinlung Hills Council inthlanpui neih tur atan Aizawl district election officer Lalhriatpuia, bawrhsap chuan November 2, Inrinni aṭanga inthlan zawh hma chu Zokhawthiang, Khawpuar, Zilthawchhuah (Vaitin) leh Luakchhuah (New Vervek) khaw rama ramrite khâr a nih thu a puang. Ramri khar hi ramri kâna inthlan tibuai thei thil a thlen lohna atana tih a ni.

Kuhva leh heroin

Assam Rifles chuan November 2, Inrinni khan Champhai Zote huam chhungah Lalrempuia (25) hnen aṭangin heroin no. 4 gram 51.510 an man a; Champhai Keifangtlangah ram dang aṭanga lak luh nia hriat kuhva rah ip 200 (kg. 16,000) an man bawk. Heroin hi Excise & Narcotics hnenah an hlan a, kuhva chu Customs hnenah an hlan a ni.

Ramsa leh sava pêl leh veh khap

Siaha leh Serchhip district magistrate-te chuan thupek chhuahin, an district chhungah sava leh ramsa veh/kah khap a nih thu an puang a, "Mi tu mahin airgun/air rifle, silai, sairawkerh leh hmanraw dang hmangin ramsa leh sava reng reng an vehin an kap/man/tihlum tur a ni lo," an ti. Thupek zâwm lote chu BNS Section 223 hmanga hrem theih an ni.

Hnama Harhna intawhkhawm

Zoram Thar Zofate Lairêlna Inpui chuan chawlhkar liam ta khan Vanapa Hall-ah Zofate Hnama Harhna Intawhkhâwm (Zofate National Awakening Convention) an buatsaih a, mi ṭhahnem tak an tel. November 2, Inrinni khan a ṭiak. Intawhkhawm thupui chu 'I thovang u khai, i din teh tak ang u' tih a ni a, Zoram Thar hotu Rev. Dr Zaichhawna Hlawndo-in thu a sawi ṭhin a, tlawmngai pawl leh political party aiawhte pawhin thu an sawi a ni.

MLA-in hmanpui

Lunglei district High Powered Committee (HPC) vice chairman V Malsawmtluanga, MLA chuan November 2, Inrinni khan Mizoram Open Arm Wrestling Championship vawi 10-na a hawng. Championship hi Lunglei HPC leh Mizoram State Sports Council bultuma Mizoram Arm Wrestling Association leh Lunglei District Arm Wrestling Association buatsaih a ni. V Malsawmtluanga hian Inrinni zan khan Mizoram Basketball Association leh Lunglei DBA buatsaih Inter-District Basketball Tournament khârna hun a hmanpui bawk.