NH-302 Lunglei-Tlabung kawng siam muan vangin lungawi lohna lantir tum

Lunglei Ṭhalai Pawl (LṬP) chuan NH 302, Lunglei leh Tlabung inkar kawngpui siam hna a muan lutuk avangin lungawi lohna lantir an tum thu an puang.

LṬP hruaitute chuan November 2, Inrinni khan Lunglei Press Club-ah thuthar thehdarhtute an kâwm a; chief organiser Lalduhawma Pachuau chuan, Lunglei-Tlabung kawng chu NHIDCL hnuaiah BRN company-in an siam thu sawiin, "Duhthusama hna an thawh loh avangin, a ruaitu leh contractor-te chungah lungawi lohna lantir kan tum," a ti.

Lalduhawma chuan, Lunglei-Tlabung kawng siam chu pawl hrang hrang aiawhte'n ṭhahnemngai takin vil ṭhin mah se, hmasawnna ṭha leh lungawithlak hmuh tur a awm ngai lo tih sawiin, "NHIDCL leh an hnuaia contractor-te'n kawngpui siam hna hi an vei tak tak lo niin a lang," a ti a; kawng an siam muan avangin mipuiin kum li chhung harsatna an tawh tawh thu a sawi.

LṬP Chief Organiser chuan, fûr a thlen leh hunah pawh an buai chhunzawm leh dawna an hriat thu sawiin, "Phairuang lei leh Tuichawng leite tun dinhmunah hmalakna awm miah lo ang a la ni. Lunglei Municipal Council huam chhungah pawh hmalakna a la tlem hle. A ṭul chuan hnathawktute pisa khar thlengin lungawi lohna kan lantir ang," a ti.

LṬP hruaitute chuan, ngun taka an zir chian aṭangin NHIDCL leh BRN company-te'n khawl leh hna thawktu ruai loin, inthlahdah takin a remchang apiang hnathawk tura pawt khawmin an namnûl mai mai nia an hriat thu an sawi a, "Kawngpui ro tling, a nih dan tur anga siam a nih ngei theih nan theihtawp chhuah thar leh kan tum," an ti a, an hmalakna ṭawiawm turin mipui an ngen.

Zawhna chhangin LṬP hruaitute chuan, hma an lakna turah hian NH 302-in a paltlang khaw hrang hranga mipuite'n an thlawp ṭha niin an sawi.