Aizawlah vendor 906 vel a awm

Aizawl Municipal Corporation (AMC) chuan Aizawl khawpui chhung hmun 73-ah kawng sira thil zawrh theihna a siam a, chu'ngte chu vending zone 42 leh restricted vending zone 31 niin, mi 906 chuangin thil an zuar ṭhin.

RTI Act hmanga zawhna AMC SPIO-in a chhan danin, AMC huam chhungah kawng sira hmun nghet neia thil zawrh theihna (vending zone) 42-ah thil zuartu (stationery vendor) 370 ṭhut theihna a awm a; Inrinni bik chauha thil zawrh phalna (restricted vending zone) 31-ah thil zuar (temporary vendor) ṭhut theihna 536 vel a awm.

AMC hotute chuan, Inrinni bika thil zawrh phalna (restricted vending zone) 31-a thil zuar zat sawi mai theih a nih loh thu an sawi a, "Inrinni bazarah hian hmun hrang hrang aṭangin an rawn ṭhu ṭhin a, ṭhu zat a danglam ve reng avangin mi engzat chiah nge ṭhu ṭhin tih hriat a harsa," an ti a; vendor-te ṭhut man (vending fee) chungchang chu la ngaihtuah leh tur a nih thu an sawi.

RTI zawhna chhannaa a lan danin, Aizawla hmun nghet neia thil zawrh theihna (vending zone) 42 zinga 39 chu thei leh thlai zawrhna hmun a ni a; a bak hmun pathum chu sa leh thil hrang hrang (variety) zawrhna hmun a ni.

Inrinni bika thil zawrh phalna (restricted vending zone) hmun 31 zinga 24 chu thei leh thlai zawrhna hmun a ni a; hmun pahnihah Inrinni chawhmeh bazar awmin, a dang zawng chu mobile phone kaihhnawih zawrhna te, zing kara thingpui dawr leh variety zawrhna hmunte a ni.

AMC area-a vendor tamna ber Khatla kâwn - JL HSS pêng inkarah vendor seat 76 a awm a, hei hi restricted vending zone niin, thei leh thlai zawrhna hmun a ni.