Mau chi kûi ṭiah buaipui tumna kan nei rih lo - Horticulture Minister

Horticulture depart­ment chuan sorkar hmasa lamin a buaipui mau chi kûi ṭiah ang chi chu bawhzui zel a tum tawh rih lo a, tualṭo mau erawh theihtawpa buaipui a tum thung.

Vanglaini palai zawhna chhangin Horti­culture minister Prof. Lalnilawma chuan, mau chi kui ṭiah buaipui zui zel tumna an neih loh thu a sawi a, "Kan la sawiho lo hrim hrim. Tun dinhmunah chuan buaipui zel kan tum rih lo. Plantation lo awm tawhte chu a ngaiin a awm mai turah kan ngai," a ti.

Horticulture Minister chuan, sorkar laipui lamin Bamboo Value Chain Development in Northeast (BVCDNE) hnuaiah mau buaipui tura an rawn tih thu sawiin, "He project hian mau sâwngbàwlna leh a market thlengin a huam," a ti a; project hnuaiah hian mau chi kui ṭiah leh chìn hlawhtlinte chu buaipui tel theih a nih tur thu a sawi.

Prof. Lalnilawma chuan theihtawp chhuah­in mau an buaipui tur thu a sawi a, "Tun dinhmunah chuan kan tualṭo maute buaipui kan tum ber rih," a ti bawk.