General PYD (NEI) Conference a ṭiak; Ruihhlo ngaite tan beihpui thlak an rêl

UPC North East India hnuaia General PYD Conference vawi 46-na, Hnahthial North-II VC Ground-a October 31, 2024 zana ṭan chu nizan khan a ṭiak. Inkhawmpuiah hian ruihhlo ngaite chhanchhuah beihpui thlak an rêl.

Confe­rence-ah hian November 1, 2024 khan Hnahthiala Horeb Conference Hall-ah rorel a ni a, General PYD president Rev. C Lalthantluanga'n kaihruaiin, rorel palai mi 200 vel an tel. Rorelah hian kum 2025 chhungin ruihhlo ngaite chhanchhuah beihpui thlak an rêl a, beihpui thlak dan tur chu General PYD Board kutah an dah.

Kum 2025-26 chhunga PYD kumpuan atan tuna an hman mek 'Thuthlung puan uar' hman chhunzawm an rel a; kum 2026 General PYD Conference chu ruat lawk tawh angin Chhimtuipui district-ah nghah a ni ang. Rorel inkhawm hlânin pandal-ah Rev. Lalchuailova kaihhruaiin fellowship hun hman a ni.

Inkhawmpuiah hian palai inziak lut mi 3,369 an awm a, inziak lut lo eng emaw zat an awm bawk. Inkhawmpuiah hian General PYD sub-committee hrang hrang hnuaia bial leh tualchhung PYD thawk ṭhate hnenah lawmman sem a ni.

Inkhawmpui report-a a lan danin, General PYD hnuaiah hian district 12 leh mission field pasarih a awm. Pastor bial 141-a tualchhung kohhran 648-ah PYD member 28,393 an awm mek a, mipa 17,165 leh hmeichhia 11,228 an ni.