SHC inthlan atana campaign hun a tawp; Bial 12-ah candidate 49 an awm dawn

November 5, 2024-a Sinlung Hills Council (SHC) inthlan neih tur atana campaign hun chu nimin tlai dar 4 khan a tawp. SHC-ah hian bial 12 a awm a, inthlanah hian candidate 49 an awm dawn.

SHC-a bial 12-te chu district pathuma mite a ni a; Aizawl district-ah bial ruk, Kolasib district-ah bial hnih leh Saitual district-ah bial pali a awm. MLA bialah chuan Tuivawl constituency-ah bial paruk, Chalfilh constituency-ah bial pali leh Serlui constituency-ah bial pahnih a ni. SHC inthlan turah hian Aizawl, Kolasib leh Saitual DC-te chu an huam chhungah district election officer (DEO) an ni.

Inthlan vote thlak hun tawp aṭanga chhiar leta darkar 48 chhunga campaign khap a nih angin, nimin tlai dar 4 khan campaign hun a tawp. Darkar 48 chhung hian electronic media, social media leh a tlukpui dangahte inthlan kaihhnawih, mipui rilru tidanglam thei thil tarlan/chhuah phal a ni lo a; opinion poll lak khap a ni bawk.

Campaign hun a tàwp tak avang hian DEO-te chuan political party leh candidate-te tan campaign an khap tawh a; bial pawn aṭanga campaign tura kal, SHC huam chhunga vote nei lote chu SHC huam chhung chhuahsan tawh turin an hriattir. Hei hian candidate leh election agent, party office bearer leh state in-charge a ruatte erawh a huam lo.

SHC inthlan chuh tura hming pek luhte chu October 11, 2024 khan endik a ni a, mi 50-in hming pe lutin, pawm vek a ni. October 14, Thawhṭanni tlai dar 3 thleng khan inhnuhdawhna hun hawn a ni a, BJP candidate pakhat a inhnuhdawh avangin candidate 49 an awm dawn ta a ni.

Khawlian, Ṭinghmun leh Saipum bialahte candidate paruk ṭheuh an awm a; Phuaibuang bialah candidate panga, Suangpuilawn, New Vervek leh Saiphai bialah candidate pali ṭheuh leh, Vanbawng, Ratu, Sakawrdai South, Sakawrdai North leh Zohmun bialahte candidate pathum ṭheuh an awm.

November 5, 2024 zing dar 7 aṭanga tlai dar 4 inkarah vote thlak tur a ni a, vote thlak zawh veleh ballot box zawng zawng constituency headquarters panpui nghal tur niin, constituency headquarters-ah ballot box a thlen kim hnuah vote chhiar a ni ang. SHC-ah hian voter 23,794 an awm a, mipa 11,875 leh hmeichhia 11,914 an ni.