A thlâwna sem kalsanin, thawhrimna hmanga din chhuah tumin ke kan pên - Chief Minister

Chief minister Lalduhoma Handholding Scheme-in mi taimate lam a hawi thu sawiin, "A thlawna sem emaw, dawn emaw rilru kalsanin, thawhrimna hmanga din chhuah tumin ke kan pên mek," a ti a, Mizoramin bung thar a kai mek thu a sawi.

CM Lalduhoma hian nimina Aijal Club-a National Livestock Missions (NLM) leh Handholding Scheme kal dunna tur (convergence) a hawnnaah thu sawiin, "Handholding Scheme hian mi taimate lam a hawi a, chutiang mite tana buatsaih a ni. Kan ram hian bung thar kan kai mek a, a thlawna sem emaw, dawn emaw rilru kalsanin, thawhrimna hmanga din chhuah tumin ke kan pên mek a ni," a ti.

Bâna Kaih hmanga sorkar thawhpuitu (partner) nih dil an tam tawh thu leh lawmawm a tih thu sawiin Lalduhoma chuan, "Kuminah hian pilot phase ang chauhin kan la kal a ni tih mipuite'n min hriatsak se kan duh. Nakkum aṭangin lian zawkin kan kal ṭan ang," a ti a; CM Special Package dilna thehluhna hmun Chief Minister Office chu a diltute tana pan a harsat avangin district tina DC office-ah thehluh theih turin ruahman a nih thu a sawi.

Chief Minister chuan, Covid-19 leh African Swine Fever (ASF) lên hmain Mizorama agriculture leh a kaihhnawih (agriculture & allied sector) thawh chhuah zinga 45% chu AH&Vety aṭanga thawh chhuah a nih thu a sawi a, "Hripui lên hnu 2021-ah 23%-ah a tlahniam. He kan tlakhniamna aṭanga kan chhuah leh theih nan tuna kan convergence hi a ṭangkai dawn a ni," a ti.

Sorkar thuchhuah tarlan danin, NLM hi vawkpui leh kel vulh te, ar awp keuna leh ran chaw siamna lama lian tham taka hmalakna tur a ni a, ṭanpuina sum ṭhahnem tak a awm. Mizoram chu hmarchhak state zingah NLM-a ti ṭha ber niin, NLM kaltlangin mi 76-in loan an la tawh a, mi 31-in subsidy an hmu tawh. Loan latu mi 76 zinga 21 chu subsidy hmu leh tura tihfel a ni tawh bawk.

NLM leh Handholding Scheme convergence hawnnaah hian AH&Vety minister C Lalsawivunga chuan, sa, bawnghnute leh artuiah Mizoram a intodelh loh thu a sawi.

C Lalsawivunga chuan, nikum chhung khan Mizoramah bawnghnute litre nuai 76 lak luh a nih thu leh ran chaw kum khat chhungin cheng vbc. 77 vel man lak luh a nih thu a sawi a, "Kan sum thawh chhuah ve chhunte hi state pawnah a luang chhuak nasa a, a kan dan theih dan awm chhun chu thar chhuah ve a ni. Hemi kawngah hian convergence scheme hi a ṭangkai dawn a ni," a ti.

Inkhawmah hian Fisheries minister Lalthansanga leh Planning Board vice chairman Dr Kenneth Chawngliana te pawh an tel a; AH&Vety director Dr Zothanmawii leh joint director Dr Vanlalhruaia bakah, Rainbow Piggery Farm neitu C Lalrambuatsaiha ten thu an sawi a ni.