State university din dan tur sawiho; PG thlenga zir theihna tura duan a ni

Higher & Technical Education (HTE) minister Dr Vanlalthlana kaihhruaiin nimin khan Secretariat conference hall-ah Mizoram state university din tura ruahmanna, 'Draft Mizoram State University Bill’ chungchangah inrawnkhawmna buatsaih a ni. State university din tum chu post graduate thlenga zir theihna tura duan a ni.

Ṭhutkhawmah hian HTE department hotu te, Mizoram College Teachers’ Association (MCTA) aiawhte leh Mizoram sorkar hnuaia college thlan bik principal leh zirtirtute an tel. Sawiho ṭula hriat laite sawiho a ni a, zawhna leh chhanna hun hman a ni. Draft Mizoram State University Bill hi Assembly House-a put luh theih turin Cabinet meeting-ah thlirho hmasak a ni ang.

Sorkar thuchhuah tarlan danin, Mizoram State University din tumah hian Bill Drafting Committee leh Study Team din a ni tawh a; Study Team hian Cluster University of Srinagar leh Cluster University of Jammu kal dan zirin, Bill Drafting Committee thlirho turin an thehlut tawh. Draft bill hi Finance department leh Law & Judicial department hotute pawhin HTE Minister hoin an enfiah tawh bawk.

Mizoramah state university a la awm lo a; Mizoram University chu central university a ni a, ICFAI University chu private university a ni.