Zonu-in tawlhlohpuan CM bahtir

ZPM Zonu chuan chief minister Lalduhoma kaihhruai sorkarin thla 10 chhunga hma a laknate chu chhuanawm an tih thu an tarlang a; CM-in ram leh hnam a kaihhruai zelna turah duhsakna hlânin, nimin khan an president R Lalawmpuii hoin tawlhlohpuan an bahtir.

ZPM Zonu chuan, Aizawl khawpui lailia Assam Rifles battalion Zokhawsanga sawn chhuahna tura Mizoram sorkar leh Assam Rifles-te'n October 23, 2024-ah inremna an ziak ta chu lawmawm an tih thu an tarlang a, "Kum tam tak chhunga sorkarna lo chelh tawh party-te'n theihtawp chhuaha an lo beih tawh hlawhtling thei lo, ZPM kaihhruai sorkar thla 10 leka upain AR insawn chhuahna tur memorandum of agreement a ziahpui thei hi Pu Lalduhoma leadership rintlakzia leh ṭhatzia tarlannaah kan ngai," an ti.

Mizoram politics-ah dâwt leh thu dik chanve hmanga inbeihna a tam thu sawiin ZPM Zonu chuan, "ZPM ministry kan ring tâwk a, dikna leh rinawmnain hnehna a chang leh ṭhin tih hi kan dinna a ni," an ti a; Chief Minister chu ram leh hnam tan nghet taka ding a, tawlh lo turin duhsakna an hlân tih an tarlang bawk.