Artui thar tam nan Commercial Farm din dawn

AH&Vety department chuan state páwn aṭanga artui lak luh tam lutuk do lêt nan Tanhrila an department ramah artui thar chhuahna tur 'Commercial Farm' din a ni dawn a, May 2015 chhungin hawn hman an tum.

Vanglaini palai zawhna chhanga AH&Vety director Dr LB Sailo sawi danin, Commercial Farm hi Indbro Reasearch & Breeding Farms Pvt. Ltd, Hyderabad nen ṭang duna an hmalakna tur a ni a; sorkar anga thawh a rem loh avangin Zoram Poultry Development Society leh Indbro Reasearch & Breeding Farms Pvt. Ltd ten layer ár leh artui thar chhuah lamah Mizoram intodelhna turin an thawk dun dawn a ni.

Dr LB Sailo chuan, Mizo­ramah kum khat chhungin artui nuai 371 vel ei ral a ni a, chung zinga 60% vel chu Hyderabad aṭanga lo kal niin, Delhi leh state dang aṭanga lak luh ṭhahnem tak a awm tih a sawi a, "Mizorama artui ei ral zinga 30% tal Commercial Farm din thar aṭangin thar chhuah tum a ni," a ti.

Ruahman lâwk ang chuan, Zoram Poultry Deve­lopment Society (ZPDS)-te'n Commercial Farm-ah hian labour leh ar chaw an tum ang a, Indbro Reasearch & Breeding Farms-te'n ar enkawlna tur leh scientist an tum thung ang. Farm aṭang hian thla tin layer ar notê 41,000 an piantir ang a, chungte chu tualchhunga arte an hralh ṭhinna aia tláwmin an hralh chhuak ang.

Farm aṭanga artui thar chhuah aṭanga hlawkna chu state sorkarin 25% a chang ang a, Indbro Reasearch & Breeding Farms-in 25% leh Zoram Poultry Development Society-in 50% an chang dawn a ni.

Dr LB Sailo chuan, Commercial Farm-a mi tur artui 9,000 a lo thleng tawh tih sawiin, "Awp keu (hatchery) tir mek a ni. Ar notê 2500 a lo thleng tawh a, 2,500 dang a lo thleng leh thuai ang," a ti.

Zawhna chhangin Dr LB Sailo chuan, Commercial Farm-ah power supply a khaihlak loh nan generator an bun tawh thu a sawi a; ar chaw pek tur pawh a awm reng theih nan Ramrikawna Feed Mill chu metric ton 100 her chhuak thei tura tihlen a nih dawn thu a sawi bawk.