Reiek kaia Tlawng lei thar hawng

Reiek kaia Tlawng lei dawh thar chu nimin khan PWD engineer-in-chief Lalrinkima Hnamte-in a hawng. Lei hi PSC bridge a ni a, metre 55-a sei a ni.

Lei hawnna inkhawm hi MS Chenkual Picnic Spot-ah buatsaih a ni a, PWD chief engineer (highways) H Zoramliana'n a kaihruai. Lalrinkima chuan, Tlawng lei dawh thar tura hmalak ṭan tir lamah ruahtui tam vangin lei dawh dan tur ruahman ṭhat a ngai nih thu a sawi a, "A hnuah Covid hripui léng vangin hnathawh a sâwt thei lo a, kan tum hunah kan zo thei lo. Lei dawh thar hian mipui hnenah hmasawnna chak zawka a thlen ngei ka beisei," a ti.

Lalrinkima chuan, Mizoram PWD-in kawng km. 6,000 vela thui leh lei (bridge) 129 an enkawl mek thu sawiin, "Lei dawh mek 20 a awm a, dawh tura ruahmanna siam mek 38 a awm bawk," a ti a; tluang taka hna thawh a nih zel theih nan thawktute duhsakna a hlan a ni.