Rev. Dr Vanlal Nghaka Award hlân

Rev. Dr Vanlal Nghaka Foundation chuan nimin khan Aijal Club-ah Upa LN Tluanga hnenah Rev. Dr Vanlal Nghaka Award 2024 leh Rev. VL Zaithanga (L) hnenah Special Award an hlan a; mi pahnih hnenah Rev. Dr Vanlal Nghaka Scholarship 2024 an hlan bawk.

Rev. Dr Vanlal Nghaka Award hi Pathian rawngbawlnaa inpe leh thawh hlâwk hnena hlan ṭhin tura ruahman a ni a; award hmasa ber dawngtu Upa LN Tluanga hi Mission Veng Kohhranah kohhran upa niin, hun eng emaw chen missionary-a a kal tawh bakah, tualchhung kohhranah nasa taka rawngbawl hna thawk ṭhin a ni.

LN Tluanga hi Mizo zinga mathematics-a master degree nei hmasa ber leh doctorate degree nei hmasa ber a ni a, kum 1980 khan kohhran upa atan thlan a ni. Education department-ah director a nih laiin kum 1982 khan missionary-in Karibati-ah a kal. Mizorama a rawn haw hnuah rawngbawlna chanvo hrang hrang a chelh bawk.

Zirlai chhawmdawlna Rev. Dr Vanlal Nghaka Scholarship dawngtu zirlai pathumte chu - Ruth Lalremruati, Lunglei Venglai, AICS-a BDS zirlai te, Chinneihkhawl, West Samphai, Churachandpur district, Manipur, Serampore College-a BD zirlai leh, ATC-a BD zirlai Lalengkima Hnamte, Ramhlun North te an ni.

Rev. Dr. Vanlal Nghaka Award hi kum thum danah hlan ṭhin a ni dawn a, chawimawina thuchei leh Rs 50,000 a keng. Scholarship erawh chu kum tin sem tum a ni a, zirlai pakhatah Rs 50,000 pek a ni. Award leh scholarship sum hi Rev. Dr. Vanlal Nghaka fapa Dr Lalmalsawma Nghaka tum a ni.

Nimina award hlanna inkhawm hi Rev. Dr Vanlal Nghaka Foundation chairman Rev. K Lungmuana'n a kaihruai a ni.