Mizoram sorkarin pension a pek tur April - September, 2024 a pe tawh

Mizoram sorkarin National Social Assistance Programme (NSAP) hnuaia pension hrang hranga chhawmdawlna a pek Rs 1,000 chu a dawng turte hnenah kum 2024-25 chhungin kum chanve, April-September 2024 thleng pek a ni tawh.

Social Welfare & Tribal Affairs directorate leh sorkar laipuia Ministry of Rural Development-te'n sorkar laipui scheme hnuaia pension chungchang zirhona, NSAP-PPS on-boarding programme nimina an buatsaiha tarlan danin, Mizoram sorkarin kum 2024-25 aṭangin NSAP chhawmdawlna chu Rs 100 aṭangin Rs 1,000-ah a tisang a; Mizoram sorkarin chhawmdawlna a pek bik Rs 1,000 chu pension dawngtute hnenah kum 2024-25 atan April-September, 2024 thleng pek a ni tawh. NSAP-a nodal department chu SWTA a ni.

Mizoramah Indira Gandhi National Old Age Pension Scheme (tar pension) dawngtu (BPL chhungkua) mi 25,213 an awm mek a; Indira Gandhi National Widow Pension Scheme (hmeithai pension) dawngtu mi 2,310, Indira Gandhi National Disability Pension Scheme (rualbanlo pension) dawngtu mi 742 leh National Family Benefit Scheme (chhungkaw châwmtu ber thi chhungte chhawmdawlna) dawngtu chhungkua 197 an awm bawk.

NSAP-PPS On-boarding programme hi SWTA deputy director Caroline Hmingthanzuali'n a kaihruai a, SWTA minister Lalrinpuii khuallian a ni. District hrang hranga SWTA department-a officer-te an tel a, Ministry of Rural Development-a mithiamte'n thil pawimawhte an zirtir a ni.

NSAP-PPS On-boarding hi tar pension (old age pension) leh a kaihhnawih pension hrang hrang khaikhawmtu NSAP hnuaia scheme pali - Indira Gandhi National Old Age Pension Scheme, Indira Gandhi National Widow Pension Scheme, Indira Gandhi National Disability Pension Scheme leh National Family Benefit Scheme-te a awm a; chhawmdawlna dawngtute'n an bank/postal account-ah direct benefit transfer kaltlanga pawisa an dawn theihna tura sorkar laipui hmalakna a ni.

NSAP hnuaia chhawmdawlna dawng theite chu below poverty line chhungkuaa mi an ni a; NSAP hnuaia pension-te chu sorkar laipui hmalakna bakah, Mizoram sorkar hmalakna nen ṭang kawpin chhawmdawlna pek a ni.