STA-in permit an pekte chu an intiam anga awm turin an hriattir

Mizoram State Transport Authority (STA) Secretary chuan office order tichhuakin, passenger service vehicle atana permit an pekte chu an intiam ang ngeia mipui tana service vek tura ngen leh hriattir an nih thu a tarlang.

STA Secretary chuan, Mizoram Commercial Vehicle Union-te'n tuialhthei man tihhniam an phût avang leh kawng chhia avanga October 23, 2024 aṭanga lungawi lohna lantir an tum chu STA-in ngun taka an ngaihtuah thu a tarlang a, "Passenger service vehicle-te permit an dilnaah sorkar thu zâwm vek turin an intiam a ni. Permit pek chhuah dawnah sorkar thu zâwm tur leh nawrhna huaihawt lo tura intiamin, hming an ziak leh vek bawk ṭhin," a ti.

Commercial vehicle neitu ṭhenkhatte'n sorkar ngenna pawisalo leh an tiamna kalha nawrh an tum chu STA chuan ṭha a ti lo hle tih tarlangin STA Secretary chuan, commercial vehicle neitu zawng zawngte chu mipui tana harsatna siam zawnga nuar lo a, an intiam ang ngeia mipuite tana service turin a hriattir a ni.