LBS Suzuki Youth Icon 2024: Zaninah Youth Icon thar kan hre dawn ta

LBS Suzuki Youth Icon 2024 hmawrbawkna, Grand Finale chu zaninah neih a ni dawn a, Youth Icon 2024 kan hre thei dawn ta.

Top 3 - Lalbiakkima Hnamte Thentlang, Lalsangliana Bawktlang leh Peter Lalnunpuia, College Veng te chu October 17 (Ningani) zan khan hla pahnih hmangin an intihsiak leh a, an thiam tlang hle. An pathum aṭang hian tunge Youth Icon 2024 atana thlan chhuah chu zaninah Zoram mipuiten kan hre tawh ang.

Grand Finale hi LPS Arena, Falkand-ah neih a ni dawn a, a hmunah mipui tan chhim theih a ni leh ang. Zan dar 8 aṭangin programme hi an ṭan dawn a ni. Show pui leh nuam tak buatsaih tum niin, Top 3-te an zai leh dawn a, Top 5-a tling - J.Lalrosanga, Samson Lalhunruat leh Ramengmawia te an zai bawk ang. Anni bakah hian Icon lo ni tawh leh boruak nei lian, Lalrempuia (2012), Zothanpuii (2019), K. Lalthlamuankimi (2016) leh Vanlalhmangaiha te an zai dawn bawk a ni.

Youth Icon 2024 pakhatna hian lawmmanah Rs nuai 2 a dawng dawn a, pahnihnain Rs nuai 1 leh pathumnain Rs 70,000 a dawng ang. Top 10-a tlingte hian Rs 10,000 ṭheuh an dawng dawn bawk. Pakhatna aṭanga pathumna lawmnan hi show sponsor tuten an hlan ang.

Kumin hian Youth Icon audition hi online hmanga neih niin, video clip theh lut mi 453 zet an awm a, Mizoram pawn lam aṭanga theh lut pawh an awm nual a ni. Top 10 aṭangin zaithiamte hi mentor siamsak an ni. Mentor atan hian Thangbawiha, Tluanga Hnamte, Kima Chhangte leh Peka te ruat an ni. Kumin intihsiaka judge-te hi Rosy K. Remsangpuii, Victor Vanlalhruaia leh Andrew Laltlankima te an ni a, Mafeli Hlondo chu host a ni.