November 14-16, 2024-ah Leitlangpui Music Festival

Leitlangpui Music Festival, 2024 chu November 14-16, 2024 chhungin Lunglei Pukpuiah buatsaih a ni dawn a; beat contest competition, concert, food stall, museum leh cultural programme-te buatsaih tura ruahman a ni.

Leitlangpui Music Festival, 2024 chungchangah hian October 14, Thawhlehni khan Lunglei DC conference hall-ah Leitlangpui Music Festival Organising Committee chu an secretary Donny Lalruatsanga, LMC chief executive officer ni bawk kaihhruaiin an ṭhukhawm a; Music Festival hi November 14-16, 2024 chhungin Lunglei Pukpuiah buatsaih a ni dawn tih tarlan a ni.

Organising Committee vice chairman R Lalrodingi, Tourism director ni bawk chuan, sorkar laipuia Ministry of Tourism kaltlangin kum tin festival ṭum hnih buatsaih a nih theih nan fund hmuh ṭhin a nih thu a sawi a, "Kuminah pawh Tourism department chuan Leitlangpui Music Festival hi Lungleiah neih turin ruahmanna a siam a, he festival hlawhtlin nan hian sorkar department leh pawl hrang hrangte leh district mipuite thawhpuina leh ṭawiawmna kan mawmawh," a ti.

Music Festival-ah hian beat contest competition, concert, food stall, museum leh cultural programme-te buatsaih tura an ruahman niin, sorkar department hrang hrang leh pawl hrang hrangte chanvo leh mawhphurhnate siam a ni a; sub-committee hrang hrang din niin, Media & Publicity sub-committee convener atan DIPRO leh MJA Lunglei District-te ruat an ni.

Ushering & Reception leh Refresh­ment sub-committee chu Sub-Head­quarters YMA-te kutah dah niin, Accomodation sub-committee, Food Stall sub-committee leh Music Competition sub-committee te din a ni bawk.

Ṭhutkhawmah hian sorkar department hrang hrang aiawh te, NGO, MJA, Lunglei Ṭhalai Pawl, Leitlang Film Society, zirlai pawl leh prominent citizen-te an tel.