Right to Information Week hman ṭan a ni: Sorkar vil zui hi eptu lam chauh ni loin mi tin mawhphurhna a ni - IPR Minister

Mizoram Information Commission (MIC) buatsaih Right to Information Week, 2024 chu nimin khan ATI Auditorium-ah Information & Public Relations minister Dr Vanlalthlana hoin hman a ni. IPR Minister chuan, "Kan thlan tlinte vil zui hi eptu lam chauh ni loin, mi tin mawhphurhna a ni," a ti.

Dr Vanlalthlana chuan, hriatna chu chakna a nih angin huaisen taka tih turte tih a nih theih nan information data dik leh ṭha neih a pawimawh thu a sawi a, "Sorkar pawh hian vengtu ṭha a neih a pawimawh a, kan thlan tlinte vil zui hi eptu lam chauh ni loin, mi tin mawhphurhna a ni," a ti a, RTI Act chu sorkar inrelbawlna ṭha zawk, democracy tichangtlungtu, sorkar khalh ngil a, a hnathawkte fimkhurtirtu ni zel se a duh thu a sawi.

DAA/SPIO/ASPIO-te chu an mawhphurhnate ṭha taka hlen tura chahin IPR Minister chuan, "Kan thlan tlin MLA-te chu zalenna (privilege) an neih angin RTI zawhna an neihte ni 15 chhunga acknowledgement pe a, a hun tiam ni 30 chhung ngeia chhanna pek chu an tihmakmawh a ni. Mipuite chakna, information kawltu kan nih angin RTI dan hmanga zawhna awmte chu rang taka information dik pek chhuah mai bakah, mipuite hriat tur pawimawh website kaltlanga a ṭul anga puangzar zung zung a pawimawh," a ti.

MIC secretary H Dolianbuaia kaihhruaiin IPR Minister hian RTI Excellence Award 2024 a sem nghal a ni.

Chief information commissioner (CIC) John Neihlaia pawhin thu sawiin, RTI chu khua leh tuite tichaktu leh India danpuia dikna chanvo (Rights) hrang hrangte ang thoa dikna chanvo a nih thu a sawi a, "Hman tam leh hman ṭangkai a pawimawh. He dan hnuaia Section 4-in a phut angin mipuite hriat tur pawimawh, Suo Moto Disclosure neih tur a nih angin department tina DDA leh SPIO-te chu he section phut angin an zawm ang che u. Sorkar website-a information update lohte chu update ula, he dan section 26-in a phut angin mipuite hriatah RTI Act 2005 chungchang inzirtirna awareness campaign kalpui ṭhin tur a ni," a ti.

RTI Week 2024 hi district hrang hrangah pawh hman ṭan niin, RTI Act hman dan leh pawimawhna zirhona atan an hmang a ni.