National Wildlife Week hman a ni

Nimin khan Mizoram hmun ṭhenkhatah National Wildlife Week vawi 70-na hman a ni a, Aizawlah chuan Lianchhiari Rûnah Environmental, Forests & Climate Change (EFCC) minister Lalthansanga hoin hman a ni.

EFCC Minister chuan, ramngaw leh nungcha humhalh chu Kristianna nen a inzawm tlat thu sawiin, "Ramngaw leh nungchate tel lo hian kan dam khawchhuak thei dawn lo. Kan thlaite ei chhe ṭhin mah se, an tel lo chuan kan thlaite hi a ṭha thei tak tak chuang lo. Dan palzûtna vanga nungchate'n an tuar ṭhin hi a pawi a, danin a phal bak sumdawnna kalpui ṭhin hi kan hnualsuat a, kan sim a ngai," a ti.

National Wildlife Week thupui, 'Wildlife conservation through co-existence' (inngeih taka khawsa tlang chunga nungcha humhalh)' tih chu a pawimawh thu sawiin Lalthansanga chuan, "Min mamawhna aiin kan mamawhna a sang zawk a, ramsa pêl chingte hian sim a, an awm ang anga awmtir mai hi ramsa humhalhna ṭha ber a ni. Kum tluanin ramngaw leh nungchate humhalhna kawngah ṭan i la thar ang u," a ti a; ramngaw tichereu lo tur leh nungchate chunga zahngaihna lantir turin Mizoram mipui a ngen.

Principal chief conservator of forest Ashok Kumar Biswal pawhin thu sawiin, Mizoram chu India rama ram zau zawng aṭanga teha ramngaw (forest cover percentage)-a zau ber (84%) a nih thu a sawi.

Inkhawm hi EFCC secretary H Lalengmawia'n a kaihruai a, Dampa Tiger Reserve field director Agni Mitra-in Wildlife of Mizoram, Values, Conservation Issues & Way Forward tih thupui sawiin, Mizoramin protected area 11 a neih thu leh sahel ei (carnivores) chi 10 a awm mek thu a tarlang.

National Wildlife Week hi October 8, 2024 thleng neih tur a ni a; hawnna inkhawmah hian EFCC Minister hian National Wildlife Week puala buatsaih slogan, photography leh painting competition-a ti ṭhate hnenah lawmman a sem a ni.