Saitual-Saichal inkar quarry-a lungte kawng siam nan a tlâk lohah ngai
Tun hnaiah kawng siamnaa hman turin lung ṭha lo lak a awm nia sawi a awm avangin Mizoram State Project Monitoring Committee chuan nimin khan lung lâkna nia sawi Saitual leh Saichal inkara Vaibek rama Lungmuana stone quarry an enfiah a; quarry-a lungte chu kawng siamna atan hman tlâk lohah an ngai.
Quarry enfiahnaah hian MSPMC secretary Lalthanzuala Ralte bakah member - H Laldintluanga leh Vanchhungi te, PWD executive engineer Laltlanthangi Ralte leh junior engineer PC Liansailova te an kal a ni. Quarry-a lungte chu an la a, Mizoram PWD Central Laboratory, Zuangtuiah enfiah a ni ang.
Lalthanzuala Ralte chuan, quarry-a lung chu a chang lo a, a pianpui zia anga rei tak a awm theih loh avangin kawngpui siam nan a hman tlak lo tih a sawi a, "Hetiang hi Indian Standard Code of Practice ang chuan hman phal a ni lo," a ti.
MSPMC member H Laldintluanga, Mizoram University-a Civil Engineering department-a assistant professor ni bawk chuan, quarry-a lung chu ‘shale rock’ a nih thu sawiin, "Pan tê têa a ṭilh ṭhin avangin tuiin rei lo tê a chiahin an pianpui zia awlsam têin a inthlak ṭhin a, fur a nihin chirhah a chang mai ṭhin," a ti a; kawng siamna atan hman tlâk a nih loh thu a sawi.
Quarry neitu leh enkawltu Hmingsawithangi chuan, an quarry-a lungte chu August 2024 thla aṭangin national highway enkawltu NHIDCL-in an lak thu leh, hmun dangah chuan an pek ngai loh thu a sawi a ni.