Economic molecule-in Mizoram a khat A hâi chhuah ka vision - CM Zorama
Mizoram sorkarin state páwna hnathawk, Covid-19 léng vanga an hna chhunzawm thei loa Mizorama hawte chhawmdawlna tura a duan, 'Livelihood Generation for Returned Migrants Workers Due to Covid-19' chu nimin khan Aijal Club-ah tlangzarh a ni. Tlangzarhtu chief minister Zoramthanga chuan, Mizoram chu economic molecule-a a khah thu a sawi.
CM Zoramthanga chuan, Pathianin Mizote ram ṭha tak a pek thu sawiin, "Ram dangin an neih ve loh hausakna kan ramah a awm a, economic molecule-in a khat a ni. Chumi activate chu ka duh a, ka vision a ni. Israel aia a lêt 10-a hausak theihna ram Lalpa'n min pe. Kan ngaihtuahna thlâkthleng chuan heti em em hian a ni maw a lo danglam theih, kan ti ang," a ti.
Bul an la ṭan fumfê loh avangin mi tam takin an la hriat thiam loh thu sawiin Zoramthanga chuan, "Ṭhangtharte'n, 'Hei a ni maw Pu Zorama vision kha' an la tih ngei Pathian zarah ka beisei. Ram dangte aia a lêta zau leh ṭha Pathianin ram min pe," a ti a; 'Pathian puihna Zoram chuan a va dawng nasa em' tih turin Mizoram siam an tum thu a sawi.
Chief Minister chuan, Mizo ṭhalai tam zawk central service-a an luh theihna atan theihtawp an chhuah dawn tih sawiin, "Chumi atan chuan mamawh ang zelin neih ang ang kan dah ang. Hmarchhak state zingah population aṭanga chhûtin central service nei tam ber ni turin theihtawp kan chhuah ang. Hmarchhakah hmahruaitu nih kan tum," a ti.
Central service-ah Mizoram cadre neih a ngaih pawimawh thu sawiin CM Zorama chuan, "Pathianin rem a tih a, Covid-19 vaccine hmuh chhuah a nih a, Delhi-a ka kal theih chuan hei hi ka bawhzui ang," a ti a; Prime Minister leh Home Minister pawhin Mizoram cadre siamsak a nih tur thu an sawi tawh tih a sawi.
Chief Minister chuan, kut themthiam thilah pawh thluak hmanna tur tam tak a awm thu sawiin, "Kawng hrang hrangin ṭhangtharte tan eizawnna a awm. Harsatnain a tuam mekte pawhin eizawnna ṭha an hmuh theihna atan bul kan ṭan. Kan talent ṭheuh kan zawn chhuah a ngai. Lei hnuai hausakna nen rem ṭha takin a hmuak che u a ni," tiin, phaia aṭanga hawte a fuih.
Inkhawm hi Mizoram Youth Commission (MYC) under secretary H Lalnunzuala'n a kaihruai a, MYC chairman Dr Vanlalṭanpuia, MLA-in thu sawiin, Planning secretary Dr C Vanlalramsanga'n project kalphung a sawifiah.
Livelihood Generation for Returned Migrants Workers Due to Covid-19 atan hian cheng nuai 300 ruahman a ni.
Project-a component hrang hrangte
• District tin (11)-ah Entrepreneurship Development Programme kalpui
• Training/skill training buatsaih
• MZU Incubation Centre nen internship-cum-entrepreneurship/skill training buatsaih
• In lama ei tur siam/sawngbâwlna lam kalpui (ESTP for home based food processing)
• BPO, ITES Management, Animation leh Multimedia Technologies lama mite tan Incubation Infrastructure Centre din
• Tour guide ni tura training pek
• Puantah leh tualchhunga siam chhuah dangah e-commerce platform ruahman