Press mite tan RTI Act zirna buatsaih RTI hi phuba lakna tur a ni lo- CIC

Mizoram Information Commission (MIC) leh IPR department chuan, nimin khan IPR Conference Hall-ah chanchinbu mite tan Right to Information (RTI) Act chungchang zirhona an buatsaih a, chief information commissioner Lal Dingliana chuan RTI chu phuba lakna tur a nih loh thu a sawi.

RTI Act zirhona hi IPR director Jim Chozah-in a kaihruai a, CIC Lal Dingliana chuan, sorkar hmalakna leh hnathawhte hriat chu khua leh tuite chanvo a ni tih sawiin, "RTI Act hian hmuh theih lohin corruption a veng a, official-te an fimkhur phah a ni," a ti.

Lal Dingliana chuan, sorkar dik leh langtlang siam turin RTI Act a ṭangkai hle tih sawiin, "Corruption venna tur a ni a, mi beihna tur a ni lo a, phuba lakna tur a ni lo," a ti a; plain paper-a kutziak pawhin sorkarah thil hriat duhte zawh theih a nih thu leh RTI Act hmanga hriat duh zawh chu vengte hêkna a nih loh thu a sawi.

Lal Dingliana chuan, Mizoramah sorkar dik leh langtlang a awm theih nan leh eirukna chi hrang hrang veng tur leh do turin RTI Act hmang ṭangkai turin mipuite a sáwm a ni.

CIC tarlan danin, India ramah kum khatah RTI application nuai 45-50 vel lut anga ngaih a ni a; Mizoramah chuan RTI Act hman tirh aṭanga kumin March 31 thleng khan application 10,288 a lut tawh. Sorkarah chauh ni loin, sorkar aṭanga ṭanpuina dawng NGO-ah pawh RTI Act hmangin hriat duhte a zawhfiah theih.

Thusawitu dang, MJA vice president Zonunsanga Khiangte chuan, RTI Act chu thil pawimawh tak a nih thu sawiin, "RTI chungchang hi inhrilhfiah zau zel a pawimawh a ni," a ti.

RTI Act zirhonaah hian information commissioner L Hrangnawn chuan RTI Act chungchang sawifiahin, sawihona hun leh zawhna leh chhanna hun hman a ni.