KHAWTHLIR

HBC-in thisen pe

Hrangbana College NSS unit chuan nimin khan an college-ah thisen pek an huaihawt a, Civil Hospital, Aizawl tan thisen unit 91 an pe a, petute mipa 60 leh hmeichhia 31 an ni.

Faina thutiam

Nimin khan Hnahthial district-a sorkar pisa hrang hrangah faina beihpui thlakna, Swachhata Hi Seva pualin faina thutiam (Swachhata pledge) sawi rual a ni. Swachhata Hi Seva hi October 1, 2024 thleng kalpui tur a ni a, kumina thupui chu ‘Swabhav Swachhata - Sanskaar Swachhata' (Natural Cleanliness - Good Manners Cleanliness) tih a ni.

Hriselna endiksak

Saitual District Steering Committee on Swachhata Hi Seva 2024 chuan nimin khan Siatual District Hospital-ah bawlhhlawh sâwngbâwltute hriselna dinhmun enfiahna, SafaiMitra Suraksha Shivir an buatsaih. Saitual deputy chief medical officer Dr Zothanpari Chhakchhuak chuan, mahni invenna hmanrua - kutkawr, gum boot leh a dangte hmang uar turin bawlhhlawh sawngbawltute a chah.

Truck chesualah thi

Nimin zing dar 8 vel khan Lunglei district-a Haulawng leh Mausen inkarah Siahaa LPG gas dah tur AS-11 CC-8766 chu chesualin, kawng thlangah metre 200 vel an lum a, chetsualna hmunah truck khalhtu Zakir Hussain (43), Silchar a thi. Truck-ah hian driver leh handyman chauh an chuang a, handyman erawh a hliam na lutuk lo. Zakir Hussain ruang hi Haulawng leh Mausen mite'n an la chhuak a, nimin khan endik (postmortem) nghal niin, an khuaah thawn a ni. Zakir Hussain tan hian Mausen YMA-in kuang an tum a ni.

NPS Vatsalya

State Level Banker's Committee, Mizoram chuan September 18, Nilaini khan Mary Mount School leh St. Paul's Higher Secondary School-ah NPS Vatsalya (New Pension Scheme awareness programme) an buatsaih. SLBC coordinator Lalphanglo Tusing-in New Pension Scheme chungchang zirlaite a hrilhfiah. NPS Vatsalya hi September 18, 2024 khan Delhi-ah hawn a ni.