Nakkumah 'Bána Kaih' lian takin kalpui kan tum - CM

Mizoram State Policy Coordination Committee (MSPCC) buatsaihin nimin khan Planning & Programme Implementation conference hall-ah sorkar flagship programme Bána Kaih Policy (Handholding Policy) chungchang minister leh sawm bikte'n an zirho a; kaihruaitu chief minister Lalduhoma chuan, Bana Kaih Policy chu nakkum aṭangin lian taka kalpui tum a nih thu a sawi.

Chief Minister chuan, Bána Kaih scheme a taka kalpui a ni thei hnai ta chu lawmawm a tih thu sawiin, "Kumin bik hi chu pilot phase angin kan kal phawt ang. Nakkum aṭang chuan lian taka kalpui kan tum dawn a ni," a ti.

Adviser to CM (Handholding) Dr KC Lalmalsawmzauva chuan, Handholding Policy atana inbuatsaih dan leh sawm bikte puala inhrilhfiahna an buatsaih chhante a sawifiah.

MSPCC member secretary Lalmalsawma Pachuau, Planning secretary chuan scheme kalpui dan tur a sawifiah a, "Nodal department thlante hmanga kalpui tur component panga nei a ni ang. Hmalakna chhawrtute hi beneficiary ti loin, progress partner tih tur an ni a, dil tur a ni. Line department-te'n thawhpui tur an thlang ang a, training leh thil ṭul dang apiang an tihpui ang a, hmalakna tinah an kaihruai ang," a ti.

Thlai thar lei dan tur ruahmanna inhrilhfiahna hun hman nghal a ni a; sorkarin ruahmanna a siam tawh angin thlai thlan chhuah palite chu a ṭul ang zela support price pek ngei a ni dawn tih tarlan a ni.