KHAWTHLIR

Silver jubilee lawm

Providence Higher Secondary School chuan nimin khan an kum 25-na, silver jubilee lawmna thawh khatna Vanapa Hall-ah an hmang a, Aizawl West-I bialtu MLA TBC Lalvenchhunga'n a hmanpui. Jubilee lawm thawh hnihna chu naktuk Nilaini-ah an sikulah neih leh a ni ang.

Kuhva rah man

Assam Rifles chuan September 2, Thawhṭanni khan Champhai district-a Hnahlan bul, Darkhai Road-ah mi pahnih hnen aṭangin ram dang kuhva kg. 4,000 an man a, Rs 28,00,000 hûa chhût a ni.

Nungcha zirho

Environment, Forest & Climate Change department, Wildlife Crime Control Bureau (WCCB) leh Wildlife Trust of India (WTI), New Delhi-te chuan nimin khan Champhai Press Club-ah ‘Workshop on Identification of Wildlife Articles’ an buatsaih. Dan kalha ramsa leh nungcha hmanga sumdawnna kaihhnawih dan leh hrai hmanga hmalak dan te, Wildlife Protection Act, 1972 amendment, wildlife chi hrang hrang, exotic leh native species hmanga dan kalha sumdawnna chungchangte inzirtir a ni.

MMV & HMV khap

Aizawl district bawrhsap Lalhriatpuia chuan thupek chhuahin, Kulikawn - Saikhamakawn (First Cry dawr bul) kawng chu a min avangin kawngpui chu lirthei laihawl (MMV) leh a aia liante tan September 4, 2024 zan dar 12 thleng zawh khap a nih thu a tarlang. Hemi kaihhnawihah hian Aizawl Traffic SP chu hma la chhunzawm nghal tura ngen a ni.

Kawngpui sawiho

Kolasib district-a kawng chhiate siamṭhat a nih theih nana kawngpui siam mek enpui tura din Working Group chu nimin khan DC conference hall-ah an chairman B Malsawmtluangi, additional DC hoin an ṭhukhawm a, hmalak dan tur an sawiho. Kawngpui chhe zual siamṭhat hun chhung atana inremna an lo siam tawh chu a ngai anga kalpui zel an rêl a ni.