Ruihhlo Do Working Committee ṭhukhawm

State Level Ruihhlo Do Working Committee chu nimin khan Excise & Narcotics minister Lalnghinglova Hmar hoin Secretariat conference hall-ah an ṭhukhawm.

Excise Minister chuan, an hmalaknate chu a result nakkum lama an teh theihna turin kumin sorkar kum chhungin ruihhlo do danah tum bik nei râna rilru siam turin member-te a sâwm.

Ṭhutkhawmah hian ruihhlo dona tura ruihhlo dotu pawl hrang hranga sum (fund) sem dan tur thlirho a ni a; Excise & Narcotics, Police, FDA, YMA, MTP, YLA, SWD, MSACS, Mizoram district 11-a sem chhuahte bakah, training, workshop, meeting leh mass media campaign nan sorkar aṭangin cheng nuai 200 phalsak an nih thu tarlan a ni.

Sum sem chhuah hnuah ṭangkai taka hman a nih theih nan sum hman dan tur leh hman hun turte inkaihhruaina uluk leh felfai tak duan ni se, an ti a; Mizoram Social Defence & Rehabilitation Board buatsaih 'Handbook on Ruihhlo Do' tih chu ṭangkai taka hman atan an pawm.

Mizoram chhehvela ruihhlo kalkawng zirbing turin study team din ni se, an ti a; District Level Committee on Ruihhlo doah YMA Sub Hqrs, MTP leh YLA office bearer aṭangin vice chairman ruat ni se, an ti bawk.