Departmental work zinga mi dang enkawl aṭangin GST lak ṭan a ni

Taxation minister Dr Vanlalthlana chuan, mi dang enkawl (rendering of services) departmental work aṭangin chhiah, goods & services tax (GST) lak ṭan a nih thu a sawi a, "Kum 2019-a Mizoram sorkarin Composition Scheme a siam angin GST hi lak a ni dawn," a ti.

Dr Vanlalthlana chuan, sorkarin GST leh profession tax-ah huang a zauh mek thu sawiin, "Estimate a awm tawh reng si, chhiah pek loh ang chi kha sorkara lak luh dan kan ngaihtuah a, departmental work hnuaia mi dangin hna an enkawl sak (rendering of services) aṭangin GST lak a ni tawh dawn. GST hi cheng nuai 10-50 inkarah 6% lak a ni dawn a, cheng nuai 50 chung lamah 18% lak a ni dawn," a ti a; department-in an thawh a nih chuan GST lak a nih dawn loh thu a sawi.

Departmental work aṭanga GST lak chu dan hnuaiah fimkhur taka an kalpui thu sawiin Minister chuan, "Schedule of Rates (SoR) hmangin department-te hian an hna tur an chhût ṭhin a, SoR-ah chuan GST a tel vek. Departmental work-ah hna lian tak takte a lo kal ṭhin a, keini sorkar chuan GST lak kan tum," a ti a; kum 2019-a Mizoram sorkarin Composition Scheme a siam angin GST chu lak a nih dawn thu a sawi a ni.

Taxation Minister chuan, GST lak chungchangah thil dik lo ti an awm chuan department-ah hriattir zel turin mipui a ngen a, "Taxation department hi lian lo tak kan ni a, mipui nen kan ṭan rual a ngai. GST pe lo leh pe dik lo an tam a, hei hi a Kristian lo a ni," a ti a; Kristian taka chhiah pekna tura pe ṭhin turin Mizoram mipui a ngen.