Mega Oilpalm Plantation Drive buatsaih

Buhchangphai community all-ah nimin khan Mega Oilpalm Plantation Drive neih a ni a, Kolasib district bawrhsap Robert C Lalhmangaiha'n a hmanpui. Kum 2023 khan Kolasib leh Mamit district-ah oil palm aṭangin cheng nuai 700 vel lak luh a nih thu tarlan a ni.

Kolasib Bawrhsap chuan, oil palm chíngtute chu theihtawp chhuaha ṭan la zel turin a chah a, "Hetianga mission mode-a oil palm hmalakna kalpui a ni hi a lawmawm," a ti. Kut hnathawktute hlawhtlinna atan district administration aṭanga inpuih theihna a awm chuan theihtawp chhuah a inhuam thu a sawi a; Kolasib district zau hrang hranga oil palm phun turte vailiam nghal a ni.

Agriculture deputy director R Vanlalchhuanga pawhin thu sawiin, Mega Oilpalm Plantation Drive chu sorkar laipui ruahman a nih thu leh India ramin hriak ei chi intodelhna tura hma a lakna a nih thu a sawi a, "Kolasib district-a Buhchangphai khua leh Mamit district-a Darlak leh Nalzawl khua chu central sorkarin oil palm hmalaknaah NEH special scheme aṭanga a thlan an nih avangin heng khuaa oil palm chíngtute'n a bika enkawlna leh ṭanpuina chi hrang hrang an dawng dawn a ni," a ti.

Kolasib leh Mamit district-a oil palm leitu Godrej Agrovet senior executive officer Lalruatkima chuan, "Hmarchhak state-ah oil palm hi farmer level mai ni lo, business angin kan kalpui ṭan tawh a, tun dinhmunah Kolasib leh Mamit district-ah oil palm huan nei leh a rah hralh mi 744 vel an awm tawh," a ti a; kum 2023 khan oil palm aṭangin cheng nuai 700 vel an lak luh thu leh kuminah nuai 800 vel lak luh an beisei thu a sawi.