Sangha khawitute tan training buatsaih

Fisheries department leh Indian Council for Agricultural Research - Central Institute of Fisheries Education chuan nimin khan Fisheries directorate conference hall-ah Aizawl district-a sangha khawitu mi 20-te tan skill development training an buatsaih a, Fisheries minister Lalthansanga'n a hawng.

Training hi ni thum tawh niin, thupui chu 'Modern methods of freshwater aquaculture' tih a ni a, ICAR-CIFE, Kolkata leh Fisheries department-a mithiamte'n an zirtir ang. Training hawnna inkhawm zawhah Minister hian sangha khawitute hnenah sangah dil tui thùr leh thùr loh enna pH kit leh dissolved oxygen enna DO kit a sem a ni.

Fisheries Minister chuan, sangha khawia hmasawn tur leh sangha tam zawk thar a nih theih nan sorkar laipui leh state sorkarin nasa takin hma an lak thu a sawi a, "Sangha khawi hi ei leh bara intodelhna atana beiseiawm leh pawimawh a ni," a ti.

Lalthansanga chuan, "Central sorkar hnuaiah scheme aṭanga hmalak mekna leh hmalak tur tam tak a la awm a, Mizote tih dan leh scientific method kaih kawp thiam a, sangha tam zawk thar turin sangha khawitute'n hma la nga che u," a ti a; ṭanpuina hmu turte uluk taka thlan a ṭul thu leh Fisheries department-a thawktute chu a hmun ngeia tlawh chhuak zel turin a chah.

Fisheries secretary H Lalengmawia pawhin thu sawiin, Cyclone Remal vanga sangha dil sah leh chhiate siamṭhatna atan sorkar laipuiah ṭanpuina dil mek a nih thu a sawi a; tunlai thiamna hmanga sangha tam zawk thar a nih theih nana ṭan lakpui chu department-a thawkte mawhphurhna a nih thu a sawi bawk.