Ailawng-in mi kâp hlumtu hnawtchhuak; Vawiinah khawtlangin a in an ṭhiat dawn

Ailawng khawtlang chuan an khaw pa Lalrokima (61) s/o Thankhama (L) kâp hlumtu Lallawmkima (43) s/o Lalchhuana, Ailawng chu dan hmanga a na thei ang bera hrem an phût a; Lallawmkima hi an khua aṭangin an hnawtchhuak a, vawiin hian a in ṭhiahsak an tum.

Ailawng VC Secretary hnen atanga thu dawn danin, August 28, 2024 zan dar 9 vel khan Lallawmkima'n a inah Lalrokima chu tualchher pistol, maniature .22 hmangin a chalah a kâp a, a tukkhum lamah silai mû a táng.

Lalrokima chu Civil Hospital, Aizawl ICU-ah enkawl zui a ni a, September 2, Thawhṭanni chawhma dar 10:25 khan a hliam tuar loin a thi. He thilah hian Kulikawn Police Station-ah thubuai ziah luh a ni.

Lalrokima a thih tak avangin Ailawng VC leh tlawmngai pawl hruaitute chu September 2 zan khan an ṭhukhawm a, thuchhuah an siam zui nghal.

Tualthattu Lallawmkima hi nupui nei lo, fanu kum 11 mi nei a ni.

Ailawng khawtlang chuan, Lallawmkima chu an dem thu tarlangin, dan hmanga a na thei ang bera hrem an phût a, "He thihna avanga tuartu zawng zawng kan tawrhpui tak zet. Kan police chak takte avanga tual­thattu rang taka zawn chhuah a nih avangin police-te chungah lawmthu kan sawi," an ti.

LALLAWMKIMA CHUNGA AILAWNG KHAWTLANG ROREL

* Ailawng Branch YMA-in chhiatni fund leh member fee a pe kîr ang a, YMA member a nihna a hlihsak ang.

* A in ṭhiahsak a ni ang a, a hun atan September 4, 2024 (Nilaini) zing dar 7 a ni ang.

* Ailawng khua aṭanga hnawhchhuah a ni a, Ailawng ram leilung a rawn rap tawh tur a ni lo.

* Ailawng khua leh tui a nihna hlihsak a ni a, Ailawng khua leh tui a nihna anga chanvo leh hamṭhatna a neih theih zawng zawng pawh hlihsak a ni ang.

* A lo thi a nih pawhin Ailawng thlânmualah phûm loh tur a ni.