Tourism Minister conference-ah tel
September 2, Thawhṭanni khan Union Culture & Tourism minister Gajendra Singh Sekhawat leh Tourism minister of state Suresh Gopi kaihhruaiin Vivanta, Shillong-ah North Eastern & Eastern States/ Union Territories Tourism Ministers Conference neih a ni a, Mizoram Tourism minister Lalrinpuii pawh a tel.
Lalrinpuii chuan, hmarchhak state-te tourism-a hma an sawn theih nan a bika ngaihtuah an ngaih thu sawiin, "Hmarchhak khawpuite inkalpawhna ṭha tak hmanga thlun zawm leh khualzin hîp thei hmunhma tlawh tur neihte tihhmasawn a ṭul," a ti a; ruahmanna fel tak ngaihtuahsak turin sorkar laipui a ngen.
Mizorama vantlanga innghat tourism kalpui tum dan tlangpui sawiin Lalrinpuii chuan, thing leh mau, ram leilung hausakna leh mawina bakah, hnam ziarángte vawng him chungin ṭhalaite tana subsidy ṭha tak tak keng tel entrepreneurship development policy leh programme-te ruahman turin Union minister-te a ngen a ni.
Mizoram Tourism Minister chuan, inkhawmpuia tel Union minister-te leh state dang tourism minister-te chu Mizorama rawn zin a, Mizoram mawina leh khualzinte chunga Mizote ṭhatna te, hnam nun zia leh tih dante hmu ve turin a sawm a; indaidannate ṭhiata hmarchhakah tourism hmanga danglamna thlen tum ṭheuh turin a sawm bawk.
Tourism Ministers Conference-ah hian minister Lalrinpuii ṭawiawmtu Tourism secretary Dr Lalrozama'n Tourism department hmalakna leh Mizoram tourism dinhmun a lem nen a sawifiah a ni.