MSCW chairperson leh member ruatna MNF-in September 9 ral hma ngeia sût an phût

MNF Legal Board chuan nimin khan Aizawl Press Club-ah thuthar thehdarhtute an kâwm a; Mizoram State Commission for Women (MSCW) chairperson Lalchhandami, Ramhlun North leh MSCW member dangte chu dan kalha ruat niin an sawi a, September 9, 2024 tlai dar 5 hmain ruat an nihna sût an phût.

MNF Legal Board vice chairman Lalpianfela chuan, ZPM kaihhruai sorkarin MSCW a sawp chhiaah an ngai tih sawiin, "Hmeichhiate dikna leh chanvo humhalhtu tur ber chairperson ruatnaa dan bawhchhiatna thleng hi ngawih bopui mai chiah kan ngai lo. Zirlai pawlin dan kalha chairperson ruat a nih dan an au chhuahpui tawh a, Assembly House-ah pawh March 13, 2024 khan sawi chhuah a ni," a ti.

MSCW chairperson atana kum bithliah pêl tawh ruat a nih chungchang chu CM Lalduhoma'n Assembly House-ah thu dik lo hmangin sawi mâm a tum nia sawiin Lalpianfela chuan, "Vawiin thlenga dikna tungding zawnga ZPM sorkarin hmalakna a neih loh avang leh Mizoram mipui, a bikin hmeichhiate rilru a ná tih kan hriat avangin MNF kan au chhuah a ṭul ta a ni," a ti a; Chairperson chu a báng lo a nih chuan bawhzui zel an tum thu a sawi.

MNF Legal Board chuan, dan bawhchhiaa MSCW chairperson ruat leh member turte ruatna chu sût turin sorkar an phût a, "September 9, 2024 tlai dar 5 hma ngeia sût kan phût a ni," an ti.

MNF Legal Board hotute sawi danin, MSCW chu Mizoram State Commission for Women Act, 2004 sawi angin, dan hnuaiah hmeichhiate dikna leh chanvo humhalh tur leh hmeichhiate dinhmun chawi kâng tura din a ni a; chairperson leh member ruat dan tur leh office luah hun chhung turte duan vek niin, chairperson atan kum 65 pêl tawh ruat theih a ni lo.

ZPM sorkarin March 8, 2024 khan MSCW chairperson atan Lalchhandami, Ramhlun North a ruat tih sawiin MNF Legal Board hotute chuan, "Sorkar document hrang hrang leh kohhran record-ahte Lalchhandami hian chairperson atana ruat a nih hian kum 68-na a hmang mek tih chiang takin a lang," an ti.

MNF tarlan danin, Lalchhandami chu kum 60 a tlin tawh avangin March 31, 2016-ah AH&Vety department-a research officer aṭangin superanuation pension-in a chhuak. March 31, 2016-ah kum 60 a tlin tawh avangin MSCW chairperson-a ruat a nih hun March 8, 2024-ah chuan kum 68-na a hmang mek tihna a ni. Presbyterian Kohhranin baptisma a chan hun record a vawnah pawh a pian kum chu March 30, 1956 a ni.

October 6, 2023 khan MSCW member atan mi pasarih ruat an nih thu sawiin MNF Legal Board chuan, "Member pasarih an ruatte hi khawtlangah pawh mi zahawm tak tak an ni. An zinga mi pahnih hi kum over tawh avangin an bâng tawh. Member dang pakhat pawh chhan dang avangin a báng. Member dang pakhat pawh a kum a over tawh avangin báng mai tawh tur a ni. Chutih laiin, member dang pathumte chu an hun ala tawp lo," an ti.

MNF chuan, member ni laite'n bànna an thehlut lo chung leh bàntirna thupek pawh siam chuang loin sorkarin August 28, 2024 khan notification hmasa luahlânin member thar pasarih a ruat hnan tih sawiin, MSCW din hnua thil la thleng ngai lo, MSCW tihbawrhbânna a nih thu an sawi.