Paul McCartney vangin Taylor Swift-in a album tlangzarh hun a sawn

The Howard Stern Show-in an interview-naah music legend The Beatles bassist Paul McCartney chuan an album tlangzarh ni a inrual lohna turin Taylor Swift chuan a album tlangzarh hun a sawn tih a sawi.

"Rolling Stone cover-ah khan kan inlan dun tawh a, tunhnai deuhah khan min rawn email a, chutah chuan 'Tumah ka la hrilh lo a, album thar ka tichhuak dawn a ni. Ka pianchama tihchhuah ka tum a, mahse i album ni 10-ah tlangzarh i tum tih ka hre leh si a, chumi avang chuan ni 18-ah tlangzarh ka tum ta a ni' tiin a rawn sawi a, mahse chumi hnu chuan ni 18-ah tlangzarh ka tum zawk tih a hre leh si a, ni 10-a tlangzarh tur chuan a sawn leh ta zawk a ni. Ka sawi awmzia chu, midang dal lo zawngin miin kawng an lo kian ṭhin a ni. Chu chu thil mawi tak a ni," tiin Paul chuan a sawi.

Taylor Swift hian a album thar ber Folklore laizawn nia a sawi Evermore hi kar hmasa Zirtawpni khan a tlangzarh a, Folkore ang bawkin puangzar lawk lutuk lem loin a tlangzarh leh a ni. Hetah hian  Bon Iver, Haim, leh National-te a thawhpui leh a, hralh a kal leh hle dawn tih a chiang.

Paul McCartney hian vawiin hian a album thar McCartney III a tlangzarh dawn thung a ni.

Legend Paul McCartney hian  top record producer Rick Rubin thawhpuiin documentary series paruk an tichhuak dawn a, he series-ah hian Paul-a rimawi khawvel zinkawng hrang hrang hmuh tur a awm dawn.

Rubin hian McCartney musician ṭha a nihzia leh a nihdan kalkawngte a phawrh sak dawn a, a guitar hmasa ber aṭanga a sulhnu ropui tak tak hnutchhiah, The Beatles hlawhtlinna thlengin a hailang dawn, The Beatles fan tan chuan hmaih phal chi a ni lo ang.

Endeavor Content chuan he project atan hian sum a thawh dawn a, YouTube lamah minute khat leh a chanve lek trailer hmuh tur a awm tawh a ni.