Lawngtlai dist CD ratio 116.93%; Hnahthial district CD ratio 62.93%

Lawngtlai leh Hnahthial District Consultative Committee, District Level Review Committee leh District Level Security Committee-te chu nimin khan district bawrhsap ve vete kaihhruaiin an ṭhu. April-June 2024 chhunga Lawngtlai district-a bank-te credit deposit ratio chu 116.93% a ni a, Hnahthial district CD ratio chu 62.93% a ni.

Ṭhutkhawma tarlan danin, Lawngtlai district-a bank-te April-June 2024 CD ratio chu 116.93% a ni a, January-March 2024 chhunga CD ratio 121.38% chu 4.46%-in an phak lo.

Lawngtlai DC Cheemala Siva Gopal Reddy chuan, bank-te chu an hlâwkna chauh ngaihtuah lo tur leh mipui tan an theih ang anga luang chhuak turin a chah a, "Awlsam zawka mipuiin loan an lak theihna tur leh hamṭhatna an neihte hriattir turin financial literally campaign chak taka kalpui a ṭul," a ti a, sorkar nena thawkho thiam turin a chah.

Mizoram Rural Bank chiahin 'Action taken report' an thehlut chu veiawm a tih thu sawiin Bawrhsap chuan, bank dangte pawh a rang thei ang bera thehlut tur leh Annual Credit Plan (ACP) hnuaia target leh social security scheme hrang hrang an neihte hlen chhuak ngei turin a chah a ni.

Hnahthial bawrhsap Rita Lalnunmawii Pachuau chuan, mipuiin bank kalphung bakah, an chanvo tura sorkarin scheme a duante an hriat theihna tura inzirtir chu bank thawktute mawhphurhna a nih thu a sawi a; a tam thei ang ber financial literacy campaign nei turin bank hotute a chah.

April-June 2024 chhunga Hnahthial district-a bank-te CD ratio chu 62.93% a ni a, January-March 2024 chhunga an CD ratio 60.73% chu 2.2%-in an khûm a ni.