Serchhip Hospital thar tur sak hna ṭan

Serchhip District Hospital thar sak tur chu hna thawh ṭan a ni a, hna ṭan hmain nimin chhun khan Rev. ZD Lalhmachhuana’n Pathian hnenah a hlan a, hna ṭan nghal a ni.

Serchhip aṭanga thu dawn danin, Serchhip damdawi-in thar sakna atan hian cheng nuai 8,692.39 ruahman a ni a; Power Grid Corporation of India Limited (PGCIL)-in corporate social responsibility aṭangin cheng nuai 2,100 an pe a, bialtu MLA chief minister Lalduhoma’n nuai 6,845.39 a ngaihtuahsak dawn bawk. Contractor chu Zamzo Engineering Construction & Consultancy an ni a, kum thum chhunga sak zawh tura tih a ni.

Nimina hna ṭan hmaa inkhawm tawi buatsaihah damdawi-in sak chungchang buaipui tura din Joint Action Committee chairman Kapliana Pachuau chuan, PGCIL-in cheng vbc. 21 an pe leh Chief Minister-in cheng vbc. 68 chuang a ngaihtuahsak chu lawmawm an tih thu a sawi a, "Chief Minister ngenna leh duh dan angin JAC hian damdawi-in sak hna hi kan vil zui dawn a ni,” a ti.

Zamzo Engineering Construction & Consultancy neitu Rony Zolianngura chuan, damdawi-in an sak tur chu drawing ang thlapin an sa dawn a, Mizoram pum huap pawha damdawi-in chhuanawm tak ni tura sak an tum thu a sawi.