Meghalaya Deputy Chief Minister kâwm

Minister of state Lalnghinglova Hmar chuan nimin khan Megha­laya deputy chief minister Prestone Tynsong, Home minister ni bawk chu Shillong-a a inah a kâwm a, kawng hrang hranga Mizoram leh Meghalaya thawh dun theih dan tur leh Shillong-a Mizote'n harsatna an tawh ṭhinte a sawipui.

Lalnghinglova Hmar leh Meghalaya Home Minister chuan ruihhlo do turin state pahnihte ṭha taka an thawhho a ṭul thu an sawi a; Myanmar aṭanga ruihhlo tawlhruk, Mizoram a paltlang hnua Meghalaya-a man awm ṭhin chungchangah, inhriatthiam lohna leh harsatna awm loa state pahnih hotute tlang taka inbiak ṭhin ni se an ti.

Shillong-a Mizo awmte’n harsatna an tawh ṭhinte sawiin, Meghalaya state chhunga ruihhlo man ṭhinah a neitu/kawltu chu Mizo hming pú an lo ni a nih pawhin Mizo hnam anga invaihma a, Mizote'n a hnam anga harsatna an tawh phah loh nan hma la turin Lalnghinglova chuan Meghalaya Deputy CM a ngen a, "Ruihhlo tawlhtute hi Mizo hnam kengtu an ni lo a, misual an ni a, Mizo hnam anga invaihmana chi a ni lo," a ti.

Lalnghinglova Hmar chuan, Shillong khawpuia veng ṭhenkhatah Mizote'n in sak leh thawm ṭhatah harsatna an tawk a, phalsak an ni lo ṭhin tih sawiin, har­sat­na chinfelpui turin Meghalaya Home Minister a ngen bawk.

Prestone Tynsong chuan inkawm laiin Meghalaya sorkar official-te biain, Mizote'n harsatna an tawh loh nan hma la turin a hriattir nghal a; Shillong-a Mizo awmte’n harsatna an neih chuan a hnena thlen ṭhin turin Mizoram Minister a chah.

Mizoram leh Meghalaya chu tun hma aṭanga ṭhian ṭha an nih thu sawiin Prestone Tynsong chuan, Mizoram sorkar, Chief Minister leh Home Minister-te duhsakna a hlan thu leh, state pahnihte inṭhian ṭhatna chu chhawm nun zel a duh thu a sawi bawk.

Inkawmnaah hian minister Lalnghinglova Hmar hi Shillong Mizoram House-a deputy resident commissioner Lalchhanhima'n a ṭawiawm a ni.