AMC Ward-VI by-election-ah vote 4,691 (47.38%) a tla

Aizawl Municipal Corporation (AMC) Ward-VI by-election chu nimin khan neih a ni a, zing dar 7 aṭanga tlai dar 4 thleng vote thlak hun hawn niin, tlai dar 4 dinhmun ang chuan vote 47.38% a tla. Vote tlate chu August 26, 2024-ah chhiar a ni ang.

AMC Ward-VI hian Chanmari West, Edenthar leh Hunthar a huam a; polling station 10 awmin, vote nei mipa 4,601 leh hmeichhia 5,300, an vaiin voter 9,901 an awm. Voter zinga 4,691 (47.38%)-in vote an thlak a, mipa 2,170 leh hmeichhia 2,521 an ni.

Ward-VI by-election hi candidate pathum - Chawnghmingthanga (BJP), H Lalremtluanga (ZPM) leh Lalrinfeli (independent)-te an awm.

State Election Commission-in nimin tlai dar 4 dinhmun a tarlan danin, nimina by-election-ah hian Chanmari West-a polling station pangaah vote 52.53%, Edenthar Venga PS pahnihah vote 43.35% leh Hunthar Venga PS pathumah vote 42.27% a tla a ni.