Sorkar thar pian hnuah PMJVK hnuaiah Central-ah project 65 thehluh a ni tawh

District Council & Minority Affairs (DCMA) minister C Lalsawivunga chuan, kum 2023-24 chhunga sorkar thar pian hnuah Pradhan Mantri Jan Vikas Karyakram (PMJVK) hnuaiah sorkar laipuiah project 65 thehluh a ni tawh a, sum hmuh erawh a la awm loh thu Assembly House a hrilh.

Dampa bialtu MNF member Lalrintluanga Sailo zawhna chhangin DCMA Minister chuan, sorkar thar pian hnuah PMJVK hnuaia project-te ngaihtuah turin State Level Committee an ṭhutkhawm tawh thu a sawi a, "2023-2024-a SLC recommendation angin project proposal 65 thehluh a ni," a ti a; project thehluh tawhah sum hmuh erawh a la awm loh thu leh, Vanapa Hall sak ṭhatna tur project Ministry of Minority Affairs-a thehluh tawh chu Ministry-in a la tihfel loh thu a sawi.

Zawh belhna chhangin C Lalsawivunga chuan, PMJVK hnuaiah Project Monitoring Unit (PMU) din a nih tawh thu a sawi a, "PMU din hi tihmâkmawh a ni a, March 2024 khan ṭha tak din a ni. Sorkar hmasaah khan PMU din a ni lo a, project thehluhte department hriatpui loha thehluh a lo awm nual a, a pawi em em a ni. Chutiang pumpelh nan chuan PMU din a ni," a ti.

MNF member Ramthan­mawia'n sorkar hmasain PMJVK hnuaia project a siamte sorkar tharin a bawhzui lo nia a hriat thu a sawi chungchangah DCMA Minister chuan, "Sorkar hmasain project a siamte sorkar tharin theihtawpin a bawhzui a, project siamte sorkar laipuiah thehluh vek a ni," a ti a; Empowered Committee an la ṭhut loh avangin Mizoramin project a thehluhte chu ngaihtuah a la nih loh thu a sawi.

C Lalsawivunga chuan zawh belhna dang chhangin, PMJVK hnuaia project chungchangah sorkar hmasaah NECS nen Deed of Agreement siam a nih thu a sawi a, "Deed of Agreement hi March 3023-ah withdraw a ni a, consultancy dang nen deed of agreement siam a awm rih lo," a ti.

PMJVK hnuaia project thehluhte chu hmasawnna rurel dinna tur a nih avangin Mizoram sorkarin sum a tum ve tur (state matching share) 10% pek zel a tum thu Minister chuan a sawi bawk.