Hand Holding Policy-ah CM Special Package

Chief minister Lalduhoma hoin nimin khan CMO conference hall-ah Mizoram State Policy Coordination Committee leh a kaihhnawih department hotute'n Hand Holding Policy kalpui dan tur, guidelines an thlirho. CM chuan, eizawnna kalpui mek tawh, tlema zawnga puih mamawhte tan bik CM Special Package siam a nih dawn thu a sawi.

CM Lalduhoma chuan, Hand Holding Policy chu kumin bik atan pilot project anga kalpui phawt tur a nih thu leh a ṭul ang zela tihlen a nih dawn thu a sawi a, "Loan deuh veka kalpui tur a ni chungin, ṭha taka eizawnna lo kalpui mek tawh sa, tlema zawnga han puiha hmasawn dawrh theite puihna tur bik CM Special Package siam a ni dawn a, ṭanpuina sum erawh a tam thei lo ang. He Special Package dawngtu tur hi implementing department-te'n an thlang ang a, an vil zui bawk ang," a ti.

Hand Holding Policy chu tlangzarh an châk tawh thu leh, tih tur ṭul la awm apiangte chinfel vat an duh tawh thu sawiin CM chuan, "He policy hi bank-te nena ṭangkawpa kalpui tur, central scheme awm sa ṭhenkhatte nena kaihkawp (convergence)-a kalpui tur a ni," a ti a; a dawngtu tur (progress partner)-te tana rulh leh ngai hmalakna deuh zel a nih rualin, dahkham ngai lo leh a ti ṭhate tana a pung (interest) awm lo a nih thu a sawi.

Chief Minister chuan, tun hmain PMEGP chu margin money duh vangin mite'n an dil ṭhina a lan thu sawiin, "Hmalak tumna tak tak a awm ṭhin lo. Hand Holding scheme hnuaiah hi chuan khatiang chi kha a awm kan remti lo a, a thlâwna sem kan tum lo. Progress partner-te hi duhsak bik nei loin a hlawhtling ngei turte chauh thlan tur a ni," a ti.

MSPCC member secretary Lalmalsawma Pachuau, Planning secretary ni bawk chuan, Hand Holding Policy kalpui dan tur duan tawhte a sawifiah a; ZIDCO managing director LP Lalchangkima'n pugn awm lo loan kalpui dan tur leh guarantor-a sorkar a ṭan dan tur ruahmannate a sawifiah. Sawihona leh zawhna leh chhanna hun hman a ni bawk.

Ṭhutkhawmah hian Land Resources, Soil & Water Conservation minister Lalthansanga, Agriculture & Farmer Welfare minister PC Vanlalruata, Tourism minister Lalrinpuii, Horticulture minister Prof. Lalnilawma leh Labour, Employment, Skill Development & Entrepreneurship minister Lalnghinglova Hmar te an tel a; adviser to chief minister Dr KC Malsawmzauva, Committee member-te leh a kaihhnawih department hotute an tel bawk.