Champhai-ah SMS hmangin Tui sem hun tur hriattir dawn

Champhaia PHE department chuan, tui connection pawtte hnenah tui sem hun tur SMS hmangin an hriattir
ṭhin tawh dawn a; chumi atana rua-hmanna, 'SMS Blast' chu nimin khan IPR conference hall-ah Champhai DC Vanlalngaihsaka'n a hawng.

Vanlalngaihsaka chuan, tunlai thiamna hmanga PHE department-in mipuite hnena tui sem hun tur leh harsatna a awm cháng pawha harsatnate mipui hnena SMS
hmanga hriattir zung zung theihna tura SMS Blast hman theiha a peih ta chu lawmawm a tih thu a sawi a, "Mipuite'n hun leh thâ tam tak an sên thlawn ṭhin chu sutkian a ni dawn ta," a ti.

SMS Blast hawnna inkhawm hi PHE superintending engineer Lalrammawia'n a kaihruai a, Champhai SDO V Laldan-mawia'n SMS Blast kalphung a sawifiah bakah, mipui leh tlawmngaipawl aiawh kalkhawmten an hriat thiam loh an zawhte a chháng.

Champhaia PHE tui connection nei 3,742-te hnenah tui semna tur leh a sem hun tur hriattir nan SMS a hlawma thawn chhuah ṭhin a ni dawn a, eng emaw harsatna vanga tui sem a khaihlak dawn pawhin mipuite hriattirna thawn chhuah ṭhin a ni ang. SMS thawnna tur hi ICT department-in sorkar laipui e-governance programme hnuaia an buatsaih a ni.