SBM(U) leh Save the Riparian-in thawh dunna thuthlung an ziak

UDPA hnuaia Swachh Bharat Mission (Urban) 2.0 leh Save the Riparian chuan faina leh thianghlimna lama thawkho turin thawh dunna thuthlung nimin khan an ziak.

Thawh dunna thuthlung hi UDPA directorate-ah ziah a ni a; UDPA director Dr Andrew H Vanlaldika leh Save the Riparian president Ngurthanzaua Sailo ten hming an ziak a ni.

Thuthlung an ziah ang chuan SBM (Urban) 2.0 leh Save the Riparian chu kum khat chhung, July 2025 thleng an thawk dun dawn a; faina leh thianghlimna, bawlh­hlawh sâwngbâwl chung­chang mipui zirtir­na, lui leh thing leh mau humhalh, thing phun, hman khat daih sarâng (plastic) tihtawpna turtein an thawkho ang.

Save the Riparian hian March 2024 aṭangin ni 50 chhung Aizawl leh a chhehvela luikawr thenfai hnatlang an nei tawh a, an hmalakna ṭawiawmin pawl leh mi tam tak an thawk chhuak tawh.

Kumin chhungin UDPA nen ṭang dunin district khawpui tinah faina leh thianghlimna lam inzirtirna an kalpui dawn a ni.