COURT RAWKTUA PUH MAN A NI

Kumin June thla tìra Aizawl District Court rawktua puh Lalrinngheta (30) s/o Ramngaihsanga, Tuikual 'C' Mual chu July 24, 2024 khan police-in Lungleiah an man a, Court phalnain Aizawl Police Station-in an kawl mek.

Aizawl SP Rahul Alwal chuan July 27, 2024 (Inrinni) chhun khan Aizawl PS-ah thuthar thehdarhtute hnenah Aizawl District Court rawktua puh an man dan a sawifiah a; June 3, 2024-ah Special Court (NDPS Act) cashier Lalawmpuia'n Aizawl SP-ah FIR a thehluh thu leh Aizawl PS-ah thubuai ziah luh a nih thu a sawi.

Aizawl SP sawi danin, District Court cashier Lalawmpuia'n FIR a thehluhah District Court chu May 31 zan dar 7 leh June 3 zing dar 9 inkarah rawk a nih thu leh pawisa dahna safe atangin Rs 24,87,084 rûk a nih thu a tarlang.

Police-te'n an chhui zuina atangin District Court-a mi aia kala thawk thin Lalrinngheta, Tuikual chu rinhlelh a ni a, Lungleiah a awm tih hriat a nih hnuah Lunglei police-te'n July 24 khan an man a, July 24-ah vek Aizawl PS-ah lak a ni. Lalrinngheta hian District Court rawk a nih atanga kar khat vel hnuah Court-a a hna a chhunzawm lo a ni.

Police-te'n thu an zawhfiahnaah Lalrinngheta chuan District Court chu June 1 chhunah a rawk tih a puang a; thir zaina (hackshaw blade) hmangin safe kawpza a zai chhia a, chemin a kar chhe zui tih a sawi. Safe chhunga pawisa chu a zat chhiar loin a la a, a ip (bag)-a leng tawk a la a, a ipah a len loh vanga a lâk bâng eng emaw zat a la awm thu a sawi bawk.

Lalrinngheta hian MRB-a a account-ah Rs 16,52,648 a dah lut a, Rs 2,50,000-in Aerox scooter a lei a, thawmhnaw leh ruihhlo eng emaw zat leh thil dang dang a lei bawk. Aizawla hotel hrang hrangah a awm kual thin a, chumi hnuah a scooter lei hmangin Lungleiah a kal a, Lungleiah hian hotel-ah a awm kual thin.

Police-te chuan Lalrinngheta hnen atangin scooter leh helmet, Puma sneaker Rs 5,000 man, e-cigarette Rs 4,000 man, thawmhnaw eng emaw zat leh pawisa fai Rs 36,000 an man a; a MRB account-a Rs 7,63,410 chu khawih chêt theih lohin an dahtir bawk.